पणजी : पंचायत निवडणुकांबरोबर सर्वच स्थानिक स्वराज्य संस्थांच्या निवडणुकीत इतर मागासवर्गीयांमधील सर्व 19 उपजातींना आरक्षण देण्यासाठी आपले सरकार कटिबद्ध असून येत्या पंचायतींच्या निवडणुकांमध्येही ओबीसींना आरक्षण दिले जाईल यासाठी आमचे प्रयत्न सुरू आहेत, अशी माहिती मुख्यमंत्री डॉ. प्रमोद सावंत यांनी दिली आहे.

पंतप्रधान नरेंद्र मोदी यांच्या सरकारला 8 वर्षे पूर्ण झाल्याच्या निमित्ताने कामाचा आढावा घेणारे ई-बुक पणजी येथील पक्ष कार्यालयात प्रकाशित करण्यात आले. त्यावेळी ते बोलत होते. यावेळी प्रदेशाध्यक्ष सदानंद शेट तानावडे, माजी आमदार सिद्धार्थ कुंकळ्येकर, रुपेश कामत उपस्थित होते.

मुख्यमंत्री म्हणाले, सर्वोच्च न्यायालयाने घालून दिलेल्या आदेशानुसार आमचे सरकार राज्यातील ओबीसींना 27 टक्के आरक्षण देण्यासाठी प्रयत्न होतेच, त्यात त्रिसुत्री पद्धतीने हे आरक्षण लागू करण्याची अट न्यायालयाने घातल्याने या निवडणुका पुढे ढकलण्यात आल्या होत्या. अशातच पावसाळा एक कारण होते. आता उच्च न्यायालयाने दिलेल्या निर्देशानुसार 10 ऑगस्टला पंचायत निवडणुका घेण्यात येतील. यासाठी येत्या चार पाच दिवसांत ओबीसीची संकलीत माहिती राज्य निवडणूक आयोगाल देण्यात येईल आणि त्यानुसार या निवडणुका होतील.