पणजी : तृणमूल काँग्रेस नेते आणि माजी आमदार चर्चिल आलेमाव यांनी राजकारणातून निवृत्तीचे संकेत दिले आहेत. आगामी गोव्यात होऊ घातलेली 2022 ची विधानसभा आपली शेवटची निवडणूक असेल असं जाहीर केलं आहे. त्यामुळे आलेमाव यांच्या राजकीय निवृत्तीची चर्चा राजकीय गोटात रंगू लागली आहे. (Churchill Alemao News Updates)

दरम्यान, चर्चिल आलेमाव, लुईझींन फालेरो आणि आलेक्स रेजिनाल्ड लॉरेन्स हे तीन आमदार तृणमूलच्या (TMC) बाजूने गेल्याने सासष्टी तालुक्यात किमान तीन जागा तृणमूलने (TMC) जिंकण्याची आशा ठेवली होती. मात्र रेजिनाल्ड यांनी तृणमूल काँग्रेसला सोडचिठ्ठी दिल्यामुळे तृणमूल काँग्रेससमोरील अडचणी वाढल्या आहेत. त्यात राष्ट्रवादीतून (NCP) तृणमूल काँग्रेसमध्ये दाखल झालेले चर्चिल आलेमावही जरी निवडून आले तरी ते निवृत्तीच्या वाटेवर असल्याचं स्पष्ट झालं आहे.

राज्यात सध्या आलेमाव हे दुसरे नेते आहेत, जे राजकीय निवृत्तीच्या उंबरठ्यावर आहेत. याआधी काँग्रेसचे (Congress) पर्येतील आमदार आणि ज्येष्ठ नेते प्रतापसिंग राणे यांनीही राजकीय निवृत्तीची इच्छा व्यक्त केली आहे. असं असलं तरीही अद्याप त्यांनी निवडणुकीतून माघारही घेतलेली नाही. त्यामुळे पर्ये मतदारसंघात यंदा चुरस पाहायला मिळण्याची चिन्हं आहेत.