मडगाव: सध्‍या अमेरिकेत वास्‍तव करून असलेल्‍या आदित्य बकाया (वय ४१) याने आपल्‍याच तीन वर्षीय मुलीचा लैंगिक छळ केल्‍याची तक्रार त्‍या मुलीच्‍या आईने मडगाव पाेलिस स्‍थानकात केली आहे. या प्रकरणी पोलिसांनी संशयितावर गुन्‍हा नोंद करून तपास सुरू केला आहे.

मडगाव पोलिसांनी दिलेल्‍या माहितीप्रमाणे, त्‍या पिडीत मुलीच्‍या आईने दिलेल्‍या तक्रारीनुसार मडगाव पोलिसांनी संशयिताच्‍या विरोधात भारतीय न्याय संहितेच्या ८५ (स्‍वत:च्‍याच स्‍वकीयाचा छळ करणे), ३५१ (२) (धमकी देणे), बाल संरक्षण कायदा कलम ४, ८, १२ व गोवा बाल कायदा कलम ८ अंतर्गत गुन्हा नोंद केला आहे.

पोलिस निरीक्षक सूरज सामंत यांच्या मार्गदर्शनाखाली उपनिरीक्षक अनुष्का परब पुढील तपास करीत आहेत. तक्रारदार महिला मडगाव पोलिस ठाण्याच्या हद्दीत राहत असून आपल्‍या पतीने आपलाही यापूर्वी शारिरीक तसाच मानसिक छळ केला होता असे तक्रारीत म्‍हटले आहे. ऑगस्ट २०१४ ते चालू वर्षी १० ऑक्टोबरपर्यंत हा जाच सुरू होता. आपल्‍या पतीने आपल्‍याला जीवे मारण्याची धमकीही दिली होती.

तसेच आपल्या मुलीचाही त्याने लैंगिक छळ सुरू केला होता, असे तिने आपल्‍या तक्रारीत म्‍हटले आहे. दरम्यान, या प्रकरणी मडगाव पोलिस ठाण्यात संपर्क साधला असता, आम्ही तक्रार नोंद करून संशयितावर गुन्हा दाखल केला आहे. या प्रकरणी चौकशी सुरू असून सध्या तपास प्राथमिक स्थितीत असल्याचे सांगण्यात आले.