पणजी: राज्यात कोरोनाचा संसर्ग वाढत आहे. परिणामी सर्वत्र चिंतेचे वातावरण आहे. कोरोनाच्या पार्श्वभूमीवर मुख्यमंत्री प्रमोद सावंत यांच्या अध्यक्षतेखाली कोविड-19 व्यवस्थापन बैठक पार पडली. मुख्यमंत्र्यांनी गोव्यातील लोकांना लस घेण्याचे आवाहन केले आहे. याच बरोबर त्यांनी 60 वर्षावरील लोकांना बुस्टर डोससाठी पुढे येण्याचे देखील आवाहन केले आहे. (Pramod Sawant on Goa Vaccine News Update)

आरोग्य विभागाच्या माहितीनुसार, सध्या गंभीर अवस्थेत असलेल्या 16 कोरोना बाधितांपैकी 13 जणांचे लसीकरण झालेले नाही. मागील आठ दिवसात कोरोनामुळे मृत्यू झालेल्या रुग्णांपैकी 70 टक्के रुग्णांचे लसीकरण झालेले नव्हते. आरोग्य विभागाच्या आकडेवारीनुसार, मृत्यूमुखी पडलेल्या 26 प्रौढांपैकी 18 लोकांनी कोरोना लसीचा एकही डोस घेतला नव्हता.

राज्य लसीकरण अधिकारी डॉ. राजेंद्र बोरकर म्हणाले, “लस (Vaccine) आपला कोरोना पासून बचाव करते असे फक्त आम्हीच म्हणत नाही आहोत तर जागतिक आरोग्य संघटनेचे (WHO) देखील हेच म्हणणे आहे. लस घेतल्यामुळे कोरोनाची लागण होत नाही असे नसले तरी शरीर कोरोना विरुद्ध लढण्यासाठी सक्षम होते. परिणामी मृत्यूचा धोका देखील कमी होतो.

सरकारने राज्यातील आरोग्य कर्मचारी व ज्येष्ठ नागरिकांसाठी कोरोनाच्या (Coronavirus) बुस्टर डोसची व्यवस्था केली आहे. राज्य सरकारने 3 जानेवारीपासून 15 ते 18 वयोगटातील मुलांच्या लसिकरणाला सुरुवात झाली होती.