CM Pramod Sawant: गोव्याची राजधानी पणजीतील स्मार्ट सिटीच्या कामांमुळे शहरातील अंतर्गत वाहतूक व्यवस्थेचा बट्ट्याबोळ उडाला आहे. गेल्या काही दिवसात या कामामुळे ठिकठिकाणी वाहतूक कोंडीची समस्या निर्माण झाली आहे.

या कामांवरून वारंवार टीका होऊ लागल्यानंतर शुक्रवारी मुख्यमंत्री डॉ. प्रमोद सावंत यांनी या कामाची पाहणी करणार असल्याचे सांगितले होते. त्यानुसार मुख्यमंत्र्यांनी शनिवारी पणजीतील स्मार्ट सिटीच्या कामांची पाहणी केली.

या पाहणीनंतर बोलताना मुख्यमंत्री म्हणाले की, पोर्तुगीजकालीन जुनी ड्रेनेज यंत्रणा लहान आहे. त्यातील पाईप्स अनेक ठिकाणी फुटल्या आहेत. काही ठिकाणी ही यंत्रणा अडकून बसली आहे. त्यामुळे ड्रेनेज सिस्टिम ब्लॉक होते.

त्यातून दर पावसाळ्यात पणजीला पुराचा फटका बसतो. स्मार्ट सिटीच्या कामांतर्गत नवीन ड्रेनेज सिस्टिम बसवली जात आहे. त्यातून शहरातील पुराची समस्या दूर होणार आहे. स्मार्ट सिटी अंतर्गत सर्व कामे मान्सूनला सुरवात होण्यापुर्वी पूर्ण केली जातील, असेही मुख्यमंत्र्यांनी सांगितले.