CM Pramod Sawant: गोव्यात कोरोना रूग्णांमध्ये वाढ होत आहे तसेच एच३एन२ एन्फ्लुएंझाचीही काही प्रकरणे राज्यात समोर आली आहेत. त्या पार्श्वभुमीवर गोव्याचे मुख्यमंत्री डॉ. प्रमोद सावंत यांनी नागरिकांना सावधगिरी बाळगण्याचे आवाहन केले आहे.

मुख्यमंत्री सावंत म्हणाले की, देशातील कोविड-19 आणि इन्फ्लूएंझा प्रकरणांमध्ये वाढ होत असताना राज्य सरकार परिस्थितीवर लक्ष ठेवून आहे. राज्य सरकार सतर्क आहे. सरकारने यापुर्वीच याबाबत दिशानिर्देश जारी केले आहेत.

लोकांनाही सावधगिरी बाळगावी लागेल. ज्यांना फ्लूसारखी लक्षणे जाणवत आहेत त्यांनी गर्दीची ठिकाणे टाळावीत आणि आयसोलेशनचा पर्याय निवडावा.

गोव्यात मंगळवारी 23 नवे कोरोनारूग्ण आढळून आले आहेत तर सोमवारीही 17 तर रविवारी 18 कोरोना रूग्ण आढळून आले होते. कोरोना रूग्णसंख्येत चाचण्यांच्या तुलनेत चांगलीत वाढ होत असल्याचे दिसून येत आहे, त्या पार्श्वभुमीवर मुख्यमंत्री डॉ. सावंत यांनी नागरिकांना सतर्कतेचे आवाहन केले आहे.

दरम्यान, गोव्यात सक्रीय कोरोना रूग्णांची संख्या 125 वर गेली आहे. देशात कोरोनाचे नवीन 699 रूग्ण आढळून आले आहेत. त्यामुळे देशातील सक्रिय कोरोनारूग्णांची संख्या 6,559 वर गेली आहे.