Goa Health: खोतिगाव पंचायत क्षेत्रातील नागरिक कांजिण्या रोगामुळे त्रस्त झालेले आहेत. तेथे मोठ्या प्रमाणात कांजिण्याची लागण झाल्यामुळे घबराट पसरली आहे. काणकोण सामाजिक आरोग्य केंद्राच्या पथकाने या भागाला भेट देऊन सर्वेक्षण केले. शुक्रवारी पणजी येथून आरोग्य केंद्राचे आणखी एक पथक या भागाला भेट देऊन निरीक्षण करणार आहे.

काणकोण आरोग्य केंद्राच्या अधिकारी डॉ. स्नेहा आमोणकर, डॉ. दर्शन कोरगावकर, पी. एच. एन. सुचिता देसाई, प्रशांत खोलकर, उल्हास वेळीप आजच्या निरीक्षणासाठी उपस्थित होते.

म्हालबड्डे येथे एकूण 52 घरांतील 72 कुटुंबे, बड्डे एकूण 39 घरांतील 47, अवें 27 घरांतील 31 जणांना, आवळी-ए येथील 50 घरांतील 53 लोकांना असे एकूण 169 घरांतील 203 लोकांची तपासणी करण्यात आली.

यावेळी एकूण 9 जण कांजिण्याग्रस्त असल्याचे घोषित करून त्यांना विशेष काळजी घेण्यास सांगितले आहे.

आरोग्य पथकाने खोतिगाव भागातील म्हालबड्डे येथील अंगणवाडीला भेट देऊन पाहणी केली. तसेच बचत गटाबरोबर बैठक घेऊन घ्यावयाच्या दक्षतेसंदर्भात मार्गदर्शन केले.