Goa News: सोनसोडो येथील सुमारे अडीच हजार चौ. मी. जागा कब्रस्तानसाठी चिन्हांकित करण्यात आली आहे. तेथील डोंगराळ भागातील जागा उतार असल्याने तेथे इतर समाजासाठी स्मशानभूमीसाठी जागा उपलब्ध करणे अशक्य आहे.

कब्रस्तान बांधकामासाठी ‘जी- सुडा’मार्फत निविदा जारी करून त्याच्या कामाची माहिती देण्यासाठी ही सुनावणी आता येत्या 3 मे 2023 रोजी ठेवण्यात आली आहे.

सरकारने कब्रस्तानसाठी सोनसोडो येथे मुस्लीम बांधवांसाठी जागा उपलब्ध केली होती, मात्र या जागेत अनेक वर्षे बांधकामच झाले नव्हते. त्यामुळे एका मुस्लीम नागरिकाने जनहित याचिका सादर करून कब्रस्तानसाठी जागा निश्‍चित करून त्याचे बांधकामाचे निर्देश देण्याची विनंती केली होती.

सोनसोडो येथे सरकारची सुमारे 33 हजार चौ. मी. जागा डोंगर भागात आहे. त्यातील सुमारे 10 हजार चौ. मी. जागा कब्रस्तानसाठी देऊ केली होती. मात्र न्यायालयाने या जागेसंदर्भात तपासणी करण्याचे निर्देश दिल्यानंतर त्यातील फक्त 2500 चौ. मी. जागाच कब्रस्तानसाठी देणे शक्य आहे.

तर उर्वरित जागा उतार असल्याने तेथे बांधकाम होऊ शकत नाही. त्यामुळे उच्च न्यायालयाने आधी कब्रस्तानचा विषय घेतल्यानंतर इतर समाजासाठी स्मशानभूमीच्या विषयावर याचिकेवरील अंतिम सुनावणीवेळी त्यावर विचार केला जाईल, असे स्पष्ट केले.

कब्रस्तानसाठी जागा निश्‍चित

कब्रस्तानच्या बांधकामासाठी अडीच हजार चौ. मी. जमीन निश्‍चित करण्यात आली आहे. या कामाची निविदा गोवा राज्य शहर विकास प्राधिकरण (जी-सुडा) यांच्यामार्फत काढण्यात येणार आहे.

हे काम येत्या 30 एप्रिलपर्यंत पूर्ण होण्याची शक्यता आहे. या जमिनीच्या सभोवती कंपाऊंड तसेच मुस्लीम बांधवांसाठी प्रार्थना स्थळ याचे बांधकाम करायचे आहे व ते दिलेल्या मुदतीत पूर्ण होऊ शकते, अशी माहिती न्यायालयाला देण्यात आली.