पणजी: कुंकळ्ळी येथील सी. ई. एस. महाविद्यालयातील मराठी विभागाच्या वतीने जागतिक मराठी भाषा गौरव दिनानिमित्त व्याख्यान घेण्यात आले. ‘भाषिक कौशल्ये आणि रोजगाराच्या संधी’ या व्याख्यानाला गोवा विद्यापीठातील मराठी विभागाचे साहाय्यक प्राध्यापक चिन्मय मधू घैसास लाभले होते. प्रा.चिन्मय घैसास यांनी वाचन, श्रवण, भाषण व लेखन ही भाषिक कौशल्ये विद्यार्थ्यांना समजून देत मराठीतून रोजगार मिळवण्याच्या नानाविध पर्यायांची ओळख करून दिली.

जसे की- पत्रकारिता, डबींग, अनुवाद, पर्यटक गाईड, संपादन, टंकलेखन, सूत्रसंचालन, पार्श्वनिवेदक, ब्लॉगिंग, कंटेंट रायटींग इत्यादी. आपल्या भाषिक कौशल्यांवर काम करून आपण रोजगाराच्या नव्या वाटा तयार करू शकतोय हा विचार प्रस्तुत व्याख्यानात विद्यार्थ्यांमध्ये रुजवण्यात आला. कार्यक्रमाचे सूत्रसंचालनधन्यता देसाई ह्या विद्यार्थिनीने केले. मान्यवरांची ओळख वैभवी फातर्पेकर तर आभार नंदिशा नाईक हिने मानले.