Cash For job Scam Goa

फोंडा: गेल्या दोन आठवड्यापासून गोव्यात गाजत असलेल्या नोकरी घोटाळा प्रकरणात रोज नव्या घडामोडी घडत आहेत. पोलिसांकडून याप्रकरणी अटकसत्र सुरु असताना, या घोटाळा प्रकरणात मोठी घटना समोर आली आहे.

म्हार्दोळ पोलिसांनी कॅश फॉर जॉब स्कॅम प्रकरणी मंत्री गोविंद गावडे यांच्या कार्यालयातील माजी कर्मचाऱ्याला अटक केली असून, मंत्री गावडेंच्या अडचणी वाढण्याची शक्यता आहे.

म्हार्दोळ पोलिसांनी अनिकेत कांदोळकर (माशेल) याला अटक केली आहे. अनिकेत हा क्रिडा, कला आणि सांस्कृतिक मंत्री गोविंद गावडे यांच्या कार्यालयातील माजी कर्मचारी असल्याची माहिती समोर आली आहे. एवढेच नव्हे तर कॅश फॉर जॉब प्रकरणात अटकेत असणाऱ्या दीपश्री सावंत गावस हीच्यासोबत अनिकेतचे संबंध होते, अशीही माहिती आहे.

लाखो रुपयांचा नोकरी घोटळा

गोव्यात सरकारी नोकरीसाठी पैसे घेऊन घोटाळा केल्याचे प्रकरण गेल्या काही दिवसांपासून गाजत आहे. याप्रकरणात दोन्ही जिल्ह्यातून आत्तापर्यंत एकूण ३३ जणांना अटक करण्यात आली आहे.

उत्तर गोवा: १७ प्रकरणांची नोंद, १३ जणांना अटक (एका शिपायाचे नाव समोर)

दक्षिण गोवा: १२ प्रकरणांची नोंद, २० जणांना अटक (सहा महिला व १४ पुरुषांचा समावेश)

मंत्री गावडेंच्या अडचणीत वाढ

कला अकादमी नूतनीकरण घोटळ्यासह विविध आरोपांमुळे कायम वादात असणारे मंत्री गावडे यांच्याशी संबधित व्यक्तीचे नाव कॅश फॉर जॉब प्रकरणात देखील समोर आले आहे.

अटक करण्यात आलेल्या कर्मचाऱ्याला काही दिवसांपूर्वीच गावडेंनी कामावरुन काढले होते, अशी माहिती आहे. त्यामुळे याबाबत गावडेंना देखील चौकशीला सामोरे जावे लागणार का? असा प्रश्न उपस्थित होत आहे. दरम्यान, मंत्री गावडे यांनी याबाबत अद्याप कोणतेही भाष्य केलेले नाही.