मडकई: फर्मागुढी ते पणजी (Panaji) महामार्गावर वेलिंग प्रियोळ साकवाजवळ गोवादर्शनासाठी (Goa) आलेल्या कर्नाटक राज्यातील एका कार गाडीला अपघात (accident) होऊन आतील लहान मुलांसह अन्य प्रवासी किरकोळ जखमी झाले. कारचे चाक पंक्चर झाल्याचे सांगण्यात येत असले, तरी चालकाचा कारवरील ताबा सुटल्यामुळे हा अपघात झाल्याचे प्रत्यक्षदर्शी लोकांनी सांगितले.

अपघात झाल्यानंतर लगतच्या लोकांनी तसेच रस्त्यावरून जाणाऱ्या वाहनांनी थांबवून मदतकार्य केले. हा अपघात शुक्रवारी दुपारी पावणे एक वाजण्‍याच्या सुमारास (केए 01 एम 6864) झाला. वेलिंग साकवाजवळील वळणावर हा अपघात झाला. अपघातात कारगाडीचे मोठे नुकसान झाले. वाहनाचा ताबा सुटून रस्त्याच्या डोंगरकडेला आदळली. त्यामुळे मोठे नुकसान झाले. जखमींना फोंडा आयडी उपजिल्हा इस्पितळात उपचारासाठी दाखल करण्यात आले. मात्र सुदैवाने किरकोळ जखमांमुळे त्यांच्यावर उपचार करून जाऊ देण्यात आले.

गुरुवारी बाणस्तारी येथे अशाच एका पर्यटक वाहनाचा ताबा सुटल्याने रस्त्याच्या कडेला असलेल्या कठड्याला वाहनाने ठोकर दिली होती. सुदैवाने वाहनाचे किरकोळ नुकसान झाले व आतील प्रवासीही बचावले होते. नववर्ष साजरे (New Year) करण्यासाठी इतर राज्यातून मोठ्या प्रमाणात वाहने गोव्यात (Goa) आली असून त्यांना रस्त्यांचा अंदाज येत नसल्याने असे अपघात होतात, असे पोलिसांनी सांगितले.