Goa Accident : वालकिणी सांगे येथे भरधाव कार दरीत कोसळून अपघात झाला आहे. कार वेगात असल्याने चालकाचं वाहनावरील नियंत्रण सुटलं आणि कार लेन क्रॉर करुन रस्त्याशेजारी असलेल्या खोल दरीत कोसळली. या अपघातात कारचालक गंभीर जखमी झाला असून त्याला उपचारांसाठी रुग्णालयात दाखल करण्यात आलं आहे.

दरम्यान हा अपघात चालकाच्या चुकीमुळेच झाल्याचं प्रत्यक्षदर्शीने सांगितलं आहे. याप्रकरणी अद्याप पोलिस स्टेशनमध्ये कोणतीही नोंद करण्यात आली नसल्याचं पोलिसांनी स्पष्ट केलं आहे. हा अपघात एवढा भयंकर होता कारचं चाकही निखळून पडलं. कारचं अपघातामुळे मोठं नुकसान झालं असून चालकालाही गंभीर इजा झाली आहे.

कारचालक गाडी चालवत असताना मोबाईलवर बोलत असल्याची माहिती प्रत्यक्षदर्शीने दिली आहे. त्यामुळे मोबाईलच या अपघातास कारणीभूत ठरल्याची शक्यता आहे.

दुसरीकडे वेर्णा येथे भरधाव टॅक्सीने जोराची धडक दिल्याने एकाचा मृत्यू झाला आहे. मृत्यू झालेला युवक हा 27 वर्षाचा असून, तो झुआरी नगर येथील काम संपल्यानंतर घरी परतत असताना हा अपघात झाला असल्याची माहिती समोर आली आहे.

वेर्णा पोलिसांनी दिलेल्या माहितीनुसार मयत गौडा ( 27 वय ) हा जुवारी नगर येथे काम करत होता. काम संपवत दुचाकीने घरी जात असताना वेर्णा आग्नेल आश्रम सर्कलजवळ कुठ्ठाळीच्या दिशेने जाणाऱ्या काळ्या पिवळ्या टॅक्सीने त्याला धडक दिली. यातच गौडा त्याचा मृत्यू झाला आहे.