कुळे: अनमोड घाटातील राष्ट्रीय महामार्गावर असलेल्या दूधसागर देवस्थानसमोर कार व इलेक्ट्रिक मालवाहू ट्रक यांच्यात बुधवारी (ता.२३) सकाळी ८.३० वा. अपघात झाला. यात ट्रकमधील चालक नानासाहेब पोतबारे (४०) व क्लिनर किशोर गुरव (२४) तसेच कारमधील जखमी झालेले आके-मडगाव येथील विजय नावले (४४) व संजय नावले (४९) हे दोघे जखमी झाले आहे.

कुळे पोलिसांनी दिलेल्या माहितीनुसार, कर्नाटक राज्यातून मालवाहू ट्रक गोव्यात येत होता तर कार गोव्याहून बेळगावला जात होती. दूधसागर देवाच्या दर्शनासाठी कार बाजूला थांबवली असता वरून येणाऱ्या ट्रकने कारला डाव्या बाजूने धडक देत ट्रकने सायबीण व खुरीस असलेले देवस्थान मोडून टाकले.

दैव बलवत्तर म्हणून पुढे असलेल्या झाडामुळे ट्रक दरीत कोसळण्यापासून वाचला. कारमधील अन्य दोघेही जखमी झाल्याचे कुळे पोलिसांनी सांगितले. जखमी झालेल्या चौघांनाही तिस्क येथील हॉस्पिटलमध्ये उपचारासाठी पाठवून दिले होते. कुळे पोलिस निरीक्षक राघोबा कामत यांच्या मार्गदर्शनखाली हवलदार भैरू झोरे यांनी अपघाताचा पंचनामा केला.