पणजी: दोना पावला येथील एका आलिशान वस्तीत वाहन पार्क करताना झालेला हलगर्जीपणा चालक मोनिया डेरूझ याला चांगलाच महागात पडला आहे. उतारावर वाहन सुरक्षित न ठेवल्याने अनियंत्रित झालेली गाडी थेट गॅरेजमध्ये घुसली आणि तेथील आलिशान वाहनाला धडक दिली.

या घटनेत मानवी जीविताला गंभीर धोका निर्माण झाल्याने पणजी पोलिसांनी या प्रकरणाकडे केवळ अपघात म्हणून न पाहता संशयित महिला चालकाविरुद्ध गंभीर फौजदारी गुन्हा दाखल केला आहे.

पोलिसांनी दिलेल्या माहितीनुसार, ११ जुलै २०२६ रोजी सकाळी ९.४५ वाजण्याच्या सुमारास नागाळी हिल, दोनापावला येथील ‘गुड शेफर्ड रेसिडेन्स’ परिसरात हा प्रकार घडला. करंझाळे येथील डेल्फीना अपार्टमेंटमध्ये राहणाऱ्या मोनिया डेरूझ यांनी आपली गाडी एका उतारावर पार्क केली होती.

या प्रकरणात केवळ मालमत्तेचे नुकसान झाले नसून जीविताशी खेळ झाल्याचे स्पष्ट होत असल्याने पणजी पोलिसांनी यात कठोर भूमिका घेतली आहे. तक्रारदार मारिया फर्नांडिस यांच्या तक्रारीवरून पोलिसांनी संशयित महिला चालक मोनिया डेरूझ हिच्याविरुद्ध भारतीय न्याय संहिता, २०२३ च्या कलम १२५ आणि कलम ३२४(२) अंतर्गत गुन्हा नोंदवला आहे.

कार, दुचाकी, संरक्षक भिंतीचे नुकसान

वाहन पूर्णपणे नियंत्रणाबाहेर जाऊन तीव्र उतारावरून मागे सुसाट घसरत गेले आणि स्थानिक रहिवासी मारिया फर्नांडिस यांच्या खासगी गॅरेजमध्ये घुसले. या अनियंत्रित आणि जोरदार धडकेमुळे गॅरेजमधील महागडी आलिशान कार, दुचाकी आणि घराची संरक्षक भिंतीचे नुकसान झाले. गॅरेजमध्ये किंवा परिसरात त्यावेळी कोणी व्यक्ती नव्हती, अन्यथा मोठा अनर्थ घडला असता.