Candolim Murder Case: कांदोळी येथे एका पित्याने पोटच्या दोन मुलांचा गळा आवळून खून करत स्वत: गळफास घेत आत्महत्या केल्याचा प्रकार समोर आला. ओर्डा-कांदोळी येथे शनिवारी रात्री उशिरा याबाबतची माहिती उघडकीस आली. या हत्‍याकांडामुळे संपूर्ण गोवा हादरून गेला आहे. जॉय फर्नांडिस असे हत्या केलेल्या बापाचे नाव आहे. तर मुलगी अनानिया (13) आणि मुलगा जोसेफ (8) अशी मुलांची नावे आहेत. 

या घटनेमागील नेमके कारण अद्याप स्‍पष्‍ट झालेले नाही. पण, कौटुंबिक वादातूनच ही घटना झाली असावी असा प्राथमिक अंदाज उत्तर गोवा पोलीस अधीक्षक निधीन वल्सान यांनी सांगितले आहे. याप्रकरणी जॉय फर्नांडिस यांची पत्नी, आई यांच्याशी चर्चा केल्याचे वल्सान म्हणाले. दरम्यान, या घटनेच्या सर्व शक्यता तपासल्या जात असल्याचेही त्यांनी स्पष्ट केले.

दरम्यान, जॉय हा तियात्र कलेशी निगडित होता. ख्रिस्ती समाजात तो परिचित होता. कळंगुटचे माजी आमदार तोमाझीन कार्दोज यांच्या कार्यकाळात कला अकादमी पुरस्कृत तियात्र अकादमीवरही जॉयने पाच वर्षे काम केले होते. गावातील चर्च संघटना तसेच एका राष्ट्रीय पक्षाच्या कळंगुट गट समितीवरही तो बराच काळ सक्रिय होता.

जॉय हे बरीच वर्षे तियात्र अकादमीत कामाला होते. जिल्हा पंचायत निवडणुकीत पराभव झाल्यानंतर त्यांना नैराश्य आले होते. गेल्या आठ वर्षांपासून ते बेरोजगार होते. मात्र, सामाजिक कामात जॉय सहभागी व्हायचे. जॉय आणि इर्निया या दोघांमध्ये सतत वाद व्हायचे अशी माहिती समोर आली आहे. इर्निया या खासगी शाळेत शिक्षिका होता. पती- पत्नीमधील वादातूनच जॉय यांनी हे टोकाचं पाऊल उचलले असावे. अशी शक्यता व्यक्त केली जात आहे.