काणकोण : काणकोण मतदारसंघ एसटींसाठी राखीव करू नये, १२ टक्क्यांसाठी ८८ टक्के नागरिकांवर अन्याय होता कामा नये, बहुजन समाजावर अन्याय झाल्यास आम्ही रस्त्यावर उतरू आणि जातीनिहाय जनगणना झाल्यानंतरच रोटेशन पद्धतीने आरक्षण मान्य करू, असा ठराव काणकोण येथे बहुजन समाजाच्या बैठकीत सर्वानुमते मंजूर करण्यात आला.

रविवारी येथील जीएम सभागृहात ‘पिपल्स फ्रंट’तर्फे सभेचे आयोजन करण्यात आले होते. या सभेला श्री मल्लिकार्जुन देवस्थान समितीचे अध्यक्ष राजेंद्र देसाई, कोमरपंत समाजाचे उपाध्यक्ष सुनय कोमरपंत, पागी समाजाचे उपाध्यक्ष शैलेश पागी, धनगर समाजाचे झोरे, सारस्वत समाजाचे अध्यक्ष विपुल भट, भंडारी समाजाचे अध्यक्ष प्रवीर भंडारी, नरेंद्र काणकोणकर

रुद्रेश नमशिकर, शैला प्रभू देसाई, गीता परब, रॅमी डायस, कुकळ्ळी चिफ्टन ट्रस्टचे ऑस्कर मार्टिन, दैवज्ञ समाजाचे श्री वेर्णेकर, ज्ञान प्रबोधिनी मंडळाचे अध्यक्ष चेतन देसाई, माजी आमदार विजय पै, गोवा फॉरवर्डचे प्रवक्ते विकास भगत, संताजी नाईक गावकर, विपिन प्रभुगावकर, नंदीप भगत, पंकज नाईक गावकर, सम्राट भगत, किरण नाईक गावकर, दिप्तेश देसाई, राजमोहन शेट्ये, माजी नगराध्यक्ष महादेव देसाई, रंगनाथ नाईक गावकर, रत्नाकर धुरी आदी उपस्थित होते.

केंद्रीय अखिल गोमंतक क्षत्रिय मराठा समाजाचे अध्यक्ष सुहास फळदेसाई म्हणाले की, राज्यात तीन जिल्हे असून तिन्ही जिल्ह्यांतील नागरिकांना समान प्रतिनिधित्व मिळाले पाहिजे. पहिल्यांदा जातीनिहाय जनगणना आणि परिसीमन करा, या आमच्या प्रमुख मागण्या आहेत. वेळ आल्यास अन्य समाजांच्या सहकार्याने आम्हीही कायदेशीर लढाई लढण्यास तयार आहोत.

लढाई लढण्यास आम्ही तयार

पागी समाजाचे उपाध्यक्ष शैलेश पागी म्हणाले की, गेली अनेक वर्षे आपण एसटी समाजाला नेतृत्व करण्याची संधी दिली आहे. एसटी आरक्षण लादल्यास त्याविरोधातील लढाई लढण्यास आम्ही तयार आहोत. दुसरीकडे, राष्ट्रीय ओबीसी संघाचे सदस्य पंकज नमशिकर यांनी सांगितले की, क्षत्रिय मराठा समाजाने गोवा मुक्तीसाठी बहुमूल्य योगदान दिले असून काणकोणच्या ९९ स्वातंत्र्यसैनिकांपैकी ६० स्वातंत्र्यसैनिक क्षत्रिय मराठा समाजातील होते. वेळ आल्यास गोमंतक क्षत्रिय मराठा समाजाच्या खांद्याला खांदा लावून हा समाज सहकार्य करेल.