म्हापसा: कोकेन अमली पदार्थ बाळगल्याप्रकरणी ओशेल - शिवोली येथे कॅमरुन नागरिकाला अटक करण्यात आली आहे. त्यांच्याकडून १ लाख १० हजार किंमतीचे कोकेन आणि ६.८१ लाखांची रोकड जप्त करण्यात आली आहे. जुलैमध्ये त्याच्याविरोधात अमली पदार्थप्रकरणात नोंदवलेल्या गुन्ह्यात त्याचा शोध सुरु होता. हणजूण पोलिसांनी एका ऑपरेशनअंतर्गत ही कारवाई केली.

ज्यूड बौसारी (४४) असे अटक संशयिताचे नाव आहे. त्याच्याविरोधात १८ जुलै २०२५ रोजी एनडीपीएस कायद्या अंतर्गत गुन्हे शाखेने गुन्हा नोंद केला होता. तो नामबाँग फ्रेड कार्ल (२१) याला अमली पदार्थांचा पुरवठा करत असल्याचे उघडकीस आले होते.

नामबाँगला अटक केल्यानंतर ज्यूड फरार होता. त्याचा पोलिस तपास घेत होते, अखेर त्याला अटक करण्यात पोलिसांना यश आले आहे.

पोलिसांनी दिलेल्या माहितीनुसार, हणजूण पोलिस स्थानकाचे पोलिस उपनिरीक्षक रमेश हरीजण यांना संशयित ज्यूडबाबत गुप्त माहिती मिळाली होती. त्यानुसार पोलिसांनी ओशेल येथील लव्ह स्टोरी व्हिलाजवळ शोध मोहीम राबवली. यावेळी ज्यूड निळ्या रंगाच्या दुचाकीवरुन जाताना दिला.

पोलिसांनी त्याची तपासणी केली असता त्याच्याकडे १ लाख १० हजार किंमतीचे कोकेन आणि ६.८१ लाखांची रोकड आढळून आले. पोलिसांनी अमली पदार्थ आणि रोकड जप्त केली आहे. पोलिसांनी संशयिताला अटकेत ठेवले असून, पुढील तपास सुरु आहे.