कळंगूट: गोव्यात ऑक्टोबरमध्ये पर्यटनाचा हंगाम सुरू होताच पर्यटकांच्या अरेरावीच्या घटनाही समोर येत आहेत. रविवारी (१३ ऑक्टोबर) रात्री उत्तर प्रदेशातून गोव्यात फिरायला आलेल्या दोन पर्यटकांनी स्थानिक तरुणीची छेड काढली.

"आमच्यासोबत येणार का, किती पैसे घेणार" अशा आक्षेपार्ह शब्दात या पर्यटकांनी तरुणीकडे विचारणा केली. मात्र, तरुणीने धाडस दाखवत ग्रामस्थांना हा प्रकार सांगितला आणि त्या तरुणांना पोलिसांच्या ताब्यात दिले. प्रेमकुमार पांडे (वय ३०), आणि कृष्ण सिंह (वय २४) अशी या आरोपींची नावे आहेत.

शनिवारी रात्री कळंगूट येथे राहणारी तरुणी मित्रमैत्रिणींसोबत दांडिया खेळून घरी परतत होती. घरापासून काही अंतरावर असताना कारमधून आलेल्या दोन तरुणांनी तिची छेड काढली. त्या तरुणीने आरडाओरडा केल्याने स्थानिकही तिथे पोहोचले. स्थानिकांनी पर्यटकांच्या गाडीला अडवल्याने आरोपींना पळ काढता आला नाही. स्थानिकांनीच या घटनेची माहिती पोलिसांना दिली.

पोलिसांनी दोघा पर्यटकांना ताब्यात घेतले आहे. या घटनेचे व्हिडिओ सोशल मीडियावरही व्हायरल होत आहेत. जाब विचारणाऱ्या स्थानिक तरुणांनाही या पर्यटकांनी मारहाण केल्याचा आरोप आहे. पर्यटकांच्या अशा कृत्यांमुळे गोवा असुरक्षित होत असल्याचे सांगत स्थानिकांनी संताप व्यक्त केला आहे.

भारतीय न्यायसंहितेतील 74,75,78, 79 अशा विविध कलमांखाली गुन्हा दाखल करण्यात आला असून तपास सुरू असल्याचे पोलिसांनी सांगितले.