Goa Dance Bar: गोवातील किनारी भागात खुलेआम चालणारे बेकायदा डान्स बार आणि त्यामुळे पर्यटकांसह स्थानिकांना होणारे त्रास लक्षात घेत कळंगुट पंचायतीने गेल्या आठवड्यात डान्स बारचे सर्वेक्षण केले. शुक्रवारी रात्री तीन बेकायदा डान्स बार बंद झाले. यापुढेही बेकायदा व्यवसायांवर थेट कारवाई करण्यात येणार असल्याचा इशारा कळंगुटचे सरपंच जोसेफ सिक्वेरा यांनी दिला.

आतापर्यंत किनारी भागातील 16 अवैध व्यवसायांना कारणे दाखवा नोटीस बजावली असून शुक्रवारी रात्री तीन डान्स बार कारवाईच्या भीतीने बंद झाल्याची माहिती सिक्वेरा यांनी दिली. बेकायदा डान्स बार तसेच इतर अवैध व्यवसायांमुळे कळंगुट-बागा या किनारी भागाची प्रतिमा मलीन झाली होती. येथे येणाऱ्या देशी पर्यटकांची परप्रांतीय दलालांकडून मोठ्या प्रमाणात आर्थिक फसवणूक होत होती. तसेच त्यांना मारपीट करण्याच्या प्रकारांत वाढ झाली होती.

हल्लीच कळंगुट किनारी झालेल्या एका मारहाण प्रकरणात परप्रांतीय दलालांनी कळंगुटच्या पंच सदस्याच्या मुलासह अन्य दोघा मित्रांना जबर मारहाण केली होती. या घटनेनंतर कळंगुट पंचायत मंडळाने या भागात सुरू असलेले बेकायदा डान्स बार तसेच अवैध व्यवसायांवर कारवाई सुरू केली. या कामात पंचायत मंडळाकडून स्थानिक पोलिसांचे सहकार्य घेण्यात येते, अशी माहिती सरपंच सिक्वेरा यांनी दिली.

कळंगुट-बागा किनारी भागाला भेट देणाऱ्या देशी पर्यटकांची काही डान्स बारमध्ये आर्थिक फसवणूक होत असून त्यांना मारहाणही होत असल्याचे कळंगुट पोलिस स्थानकाकडून पंचायत मंडळाला पत्राद्वारे सुचित केले होते. पोलिसही अशा व्यवसायांवर बारीक नजर ठेवून आहेत, असे पोलिस निरीक्षक दत्तगुरु सावंत यांनी सांगितले.

मायकल लोबो, आमदार, कळंगुट-

किनारी भागातील बेकायदा डान्स बार वा अवैध व्यावसायिकांना कायदेशीर कारवाईला सामोरे जावे लागणार आहे. कळंगुटमधील अवैध व्यवसायांवर यापूर्वीच्या पंचायत मंडळाने कारवाईचा बडगा उगारला होता. विद्यमान मंडळही पोलिसांच्या मदतीने कारवाई सुरू ठेवणार आहे.

जोसेफ सिक्वेरा सरपंच, कळंगुट-

कळंगुटच्या अस्मितेचे रक्षण करण्यासाठी राजकीय मतभेद दूर करून आम्ही एकजुटीने काम करण्याचे ठरविले आहे. अवैध व्यवसायांविरोधात कारवाई करताना कायदा- सुव्यवस्था टिकवून ठेवण्यासाठी स्थानिक पोलिसांची मदत घेण्यात येत आहे. यापुढेही बेकायदा डान्स बारना टाळे ठोकण्यात येईल.