कळंगुट: टीटोज लेनमध्ये असणाऱ्या सार्वजनिक सुलभ शौचालयाजवळील कचऱ्यावरुन कळंगुट पंचयातीने थेट गोवा पर्यटन खात्याला नोटीस पाठवली आहे. शौचालयाजवळील कचरा लवकरात लवकर हटवा असे, पंचायतीने बजावलेल्या नोटीसमध्ये म्हटले आहे.

टीटोज लेन येथे असणाऱ्या सार्वजनिक सुलभ शौचालयाजवळ कचरा टाकल्याप्रकरणी पंचायतीने बुधवारी पर्यटन खात्याला नोटीस पाठवली आहे. सरपंच जोसेफ सिक्वेरा यांनी या प्रकरणाची गंभीर दखल घेतली असून, परिसरात कचरा टाकल्याप्रकरणी आश्चर्य व्यक्त केले आहे. येथेच कचरा विलगीकरण केले जात असल्याची माहिती उघडकीस आल्याचे सिक्वेरांनी म्हटले आहे.

पर्यटन विभाग सुलभ शौचालयाच्या जवळ कचरा विलगीकरण करत आहे. हा प्रकार धोकादायक असून, नागरिकांच्या आरोग्याशी खेळ केला जात आहे. याशिवाय पर्यटक आणि स्थानिकांना देखील याचा नाहक त्रास होत आहे, असे पंचातीने पाठवलेल्या नोटीसमध्ये म्हटले आहे.

कळंगुट - बागा पर्यटकांचे आकर्षण

कळंगुट - बागा समुद्रकिनारा नेहमी पर्यटकांसाठी आकर्षणाचा केंद्रबिंदू असतो. जवळपास सर्वच पर्यटक या समुद्रकिनाऱ्यांना भेट देत असतात. तर, नाईट लाईफच्या अनुभव घेण्यासाठी टीटोजला हजेरी लावणाऱ्यांची संख्या देखील अधिक आहे. दरम्यान, या भागातच कचरा विलगीकरण होत असल्याने स्थानिकांमध्ये नाराजीचा सूर आहे.