Goa Congress: कळंगुटमध्ये डान्स बारचा उच्छाद झाला असून त्याविरोधात पोलिसांकडे तक्रार करणाऱ्या आमदार मायकल लोबो यांचे हे कृत्य म्हणजे चोराच्या उलट्या बोंबा असल्याची टीका काँग्रेसने गुरुवारी पत्रकार परिषदेत केली.

काँग्रेस भवनात झालेल्या या पत्रकार परिषदेस पक्षाचे माजी उत्तर गोवा जिल्हाध्यक्ष विजय भिके, एहराज मुल्ला, उत्तर गोवा उपजिल्हाप्रमुख राजन कोरगावकर आदी उपस्थित होते. भिके म्हणाले, राज्यातील कायदा आणि सुव्यवस्था ढासळली आहे. कायदा आणि सुव्यवस्था ढासळल्याचे आपण नाही, तर पक्षाचेच नेते म्हणत आहेत.

माजी मंत्री आणि सध्याचे आमदार तसेच पंचवीस वर्षे सरपंच असलेले नेते मुख्यमंत्र्यांकडे जातात आणि कायदा व सुव्यवस्था ढासळली आहे, पोलिस आमचे काहीच ऐकत नाहीत. यापूर्वी मायकल लोबो यांना आपल्याच मुख्यमंत्र्यांवर विश्‍वास नसल्याचे दिसून येते. ते यापूर्वीही बोंब मारत होते आणि आताही मारत आहेत.

कळंगुटमध्ये जो विकास लोबो यांनी केला, तो विकास हा बेकायदेशीर कामांतूनच केला आहे. आता बेकायदेशीर कृत्यांतून लोबो यांना कदाचित कमिशन कमी मिळत असेल किंवा मिळतच नसेल म्हणून सध्या त्यांचे नाटक दिसून येते, असेही भिके म्हणाले.

‘लोबोंच्या आशीर्वादानेच बेकायदेशीर कृत्ये’

वकिलास मारहाण झाल्यानंतर न्याय मागण्यासाठी मुख्यमंत्र्यांकडे जावे लागले. दुसऱ्यांच्या न्यायासाठी जे झगडतात, त्यांच्यावर जर अशी वेळ येत असेल, तर सामान्य माणसाने काय करायचे? कळंगुट परिसरात जी बेकायदेशीर कृत्ये घडत आहेत, ती आमदार लोबो यांच्या आशीर्वादामुळेच चालू आहेत.

या कृत्यात जे आहेत, त्यांना पकडावे, सरकार तुमचे आहे आणि यंत्रणाही तुमचीच आहे, या सरकारला विरोधक कोणी नको आहे, काँग्रेसचे माजी उत्तर गोवा जिल्हाध्यक्ष विजय भिके म्हणाले.