पणजी: हा जीव ‘माया’ने प्रेरित असतो. पण त्याचे अधिष्ठान परमात्माचे तत्व असते. भगवद्‌गीतेच्‍या चौदाव्या श्र्लोकात भगवंत म्हणतात की, मायायुक्त गुणांनी ग्रासलेले हे जीवन केवळ माझ्या शरणागतीने पार होऊ शकते. ‘माया’ हा शब्द आपल्या सर्व दुःखाचे कारण आहे व त्याचा इलाज परमेश्वराची शरणागती हेच आहे, असे मार्गदर्शन ब्रह्मचारिणी धारणा चैतन्‍य यांनी केले.

चिन्‍मय मिशन पणजी केंद्रातर्फे सांतिनेज येथील चिन्‍मय आलोक आश्रमात 7 ते 13 मार्च या कालावधीत ‘गीता ज्ञान यज्ञा’चे आयोजन करण्‍यात आले होते. या कार्यक्रमात शेचटच्‍या दिवशी ब्रह्मचारिणी धारणा चैतन्‍य बोलत होत्‍या.

त्‍या म्‍हणाल्‍या की, शक्तिमान माणसातील शक्ती म्‍हणजे भगवंतच आहे. ज्याची शक्ती आसक्ती व कामना या दुर्गुणांनी वर्जित आहे, जी शक्ती धर्माच्या विरोधात नाही, अशी शक्ती भगवंत आहे.

प्रत्येक सजीव आहार, निद्रा, भय, मैथुन या चार गुणांनी बाधक आहे. ही सजीवाची प्रकृती आहे. पशू-पक्षी प्रकृतीनुसार हे गुण पाळतात. पण मनुष्य हे गुण पाळताना विवेकहिन होतो. नियंत्रण न ठेवता वागतो. त्यावेळी त्याची शक्ती ही धर्माविरुद्ध असते. त्यात ईश्‍‍वराची धारणा राहत नाही. हे जग सत्व, रजत व तमस या तीन गुणांच्या आधारे बनलेले आहे. आपण जर या गुणांच्या आधीन झालो तर परमात्मा तत्वाचा आपणास विसर पडतो. समुद्राच्या पाण्यात लाटा येत असतात. त्याचे मूळ पाणी आहे. लाटा मोठ्या-बारीक होत असतात, पण पाण्याशिवाय लाटांना अस्तित्व नसते, असेही धारणा चैतन्‍य म्‍हणाल्‍या.