Bicholim News शेकडो भाविकांच्या साक्षीने आणि भक्तीमय वातावरणात बोर्डे-डिचोली येथील प्रसिद्ध ‘होमकुंड’ उत्सव बुधवारी (ता.8) मध्यरात्री मोठ्या उत्साहात साजरा करण्यात आला.

श्री वडेश्वर देवाच्या प्रांगणात हा उत्सव पार पडला. होमकुंड स्थळी आल्यानंतर मध्यरात्री पारंपरिक कार्यक्रमांनुसार श्रीं च्या कलशासहित व्रतस्थ भक्तगणांनी ‘पुंडलिक वरदे हरी विठ्ठल’ आदी देवदेवतांचा जयघोष करीत रखरखत्या होमकुंडातून अग्निदिव्य केले.

श्रींचा कळस माथ्यावर घेऊन अवसारी मोडानेही अग्नीदिव्य केले. नंतर कौलोत्सव होवून या उत्सवाची सांगता झाली. होमकुंड उत्सवावेळी अग्नीदिव्य पाहण्यासाठी भाविकांनी गर्दी केली होती. या उत्सवानिमित्त दशावतारी नाट्यप्रयोगही सादर करण्यात आला.

भक्तांकडून देवतांचा बहुमान

बुधवारी रात्री श्रीं चा कलश मंदिराबाहेर काढण्यात आल्यानंतर होमकुंड पेटविण्यात आले. नंतर वाजत-गाजत देवीच्या कलशासह व्रतस्थ भक्तगण गावतड येथील पवित्र झरीवर जाऊन त्या ठिकाणी स्नान करून पुन्हा वाजतगाजत होमकुंडस्थळी आले.

माघारी येताना भक्तगणांतर्फे श्री सातेरी, श्री महामाया, श्री रवळनाथ, श्री ब्राह्मण, श्री वडेश्वर आदी देवतांचा बहुमान करण्यात आला.