मडगाव: कुंकळ्‍ळी येथे बेकायदा बांधकामाला अभय देण्यासाठी कुंकळ्‍ळी पालिकेचे मुख्याधिकारी ज्युआव फर्नांडिस यांनी ‘प्रोटेक्शन मनी’ घेतले होते का, यासंबंधी चौकशी करा, असा आदेश मुंबई उच्च न्यायालयाने पालिका संचालकांना दिल्यामुळे कुंकळ्‍ळी पालिका वादात सापडली आहे.

या प्रकरणात मुख्याधिकारी फर्नांडिस यांचा हात असल्याचे प्रथमदर्शनी दिसत असल्याने त्यांना ताबडतोब निलंबित करत चौकशी सुरू करा, अशी मागणी याचिकादार असलेल्या ग्रीन गोवा फाउंडेशनचे अध्यक्ष रेसन आल्मेदा यांनी केली आहे.

दरम्यान, उच्च न्यायालयाच्या या निर्देशांची पालिका संचालक ब्रिजेश मणेरकर यांनी त्‍वरित दखल घेताना, उद्या यासंबंधात कुंकळ्‍ळी पालिका मुख्‍याधिकाऱ्यांना नोटीस बजावू अशी माहिती दिली.

फर्नांडिस यांचा थेट संबंध शक्य : आल्मेदा

बुधवारी गोमन्‍तक टीव्‍हीच्‍या साश्‍‍टीकार या कार्यक्रमात बोलताना ग्रीन गोवा फाउंडेशनचे अध्‍यक्ष आल्‍मेदा म्‍हणाले की, ज्‍यावेळी घर मालकाकडून ‘प्रोटेक्‍शन मनी’ दिल्‍याचा आरोप करण्‍यात आला होता, त्‍यावेळी पालिका मुख्‍याधिकारी फर्नांडिस यांनी या आरोपाची दखल घेत पोलिस तक्रार करण्‍याची गरज होती.

मात्र तसे काही न करता उलट या बेकायदा बांधकामात चालू असलेल्‍या व्‍यावसायिक आस्‍थापनाला विक्री परवाना त्‍याने दिला. हे सर्व पाहता या प्रकरणात फर्नांडिस यांचा थेट संबंध असावा असे प्रथमदर्शनी वाटते. त्‍यामुळे त्‍यांनी या प्रकरणातील पुरावे नष्‍ट करू नयेत आणि कागदपत्रांची फेरफार करू नये यासाठी त्‍यांना त्‍वरित निलंबित करणे गरजेचे आहे, अशी मागणी केली.

...तर पुन्हा न्यायालयात जाणार

पालिका संचालनालयाने ही कारवाई केली नाही तर पुन्‍हा न्‍यायालयाचे दरवाजे आम्‍हाला ठोठवावे लागतील असे आल्मेदा यांनी सांगितले. गोमन्‍तकचे ब्‍युरो चीफ सुशांत कुंकळयेकर यांनी त्‍यांची ही मुलाखत घेतली आहे. ही मुलाखत गोमन्‍तक टीव्‍हीच्‍या फेसबुक, इन्‍स्‍टाग्राम आणि यू-ट्यूबवर पाहता येईल.

फार मोठा घोटाळा

आल्‍मेदा म्‍हणाले की, कुंकळ्‍ळीत अशी अनेक बेकायदा बांधकामे आहेत, या सर्वांची चौकशी झाली पाहिजे. आम्‍हीही ही माहिती मिळवत आहोत. माहिती मिळाल्यानंतर नव्‍याने रिट याचिका दाखल करणार. घर दुरुस्‍तीच्‍या नावाखाली अनेकांनी दुमजली घरे बांधली असून ती सर्व बेकायदा आहेत. मुख्याधिकाऱ्यांच्या मदतीशिवाय या घरांना परवाने मिळूच शकले नसते असे सांगून हा एक फार मोठा घोटाळा असल्‍याचा आरोप त्यांनी केला.