हणजूण क्षेत्रातील ध्वनिप्रदूषणसंदर्भात जनहित याचिकेत प्रतिवादी केलेल्या ५ बंदिस्त क्लब्समध्ये पार्ट्यांवेळी कर्कश संगीताचा आवाज बाहेर येतो का, याची तपासणी प्रदूषण नियंत्रण मंडळाने (पीसीबी) करावी. पोलिस उपअधीक्षकांनी स्थापन केलेल्या तीन विशेष पोलिस भरारी पथकांनी पुढील आठवड्यात केलेल्या कारवाईचा अहवाल सादर करण्याचे निर्देश मुंबई उच्च न्यायालयाच्या गोवा खंडपीठाने अवमान याचिकेवरील सुनावणीवेळी दिले.

अवमान याचिकेत ज्या पाच रेस्टॉरंट्स व पब्सना ध्वनिप्रदूषणसंदर्भातच्या तक्रारीवरून प्रतिवादी केले होते त्यांना नोटीस मिळाल्यावर ते उच्च न्यायालयात हजर झाले. त्यांना या नोटिसीला उत्तर देण्यास आठवड्याची मुदत दिली आहे.

दरम्यान, खुल्या जागेत संगीत वाजवण्यात येणाऱ्या रेस्टॉरंट्स किंवा पब्समध्ये विशेष पोलिस पथकाने देखरेख ठेवावी. जर संगीताची मर्यादा दिलेल्या परवान्यापेक्षा अधिक असेल किंवा नियमांचे उल्लंघन केल्यास त्वरित कारवाई करण्यात यावी. या तीन पथकांमधील अधिकाऱ्यांचे मोबाईल क्रमांक प्रसिद्ध करण्यात आले आहेत त्यावर ध्वनिप्रदूषणाच्या तक्रारी नागरिक करू शकतात.

यांच्याविरुद्ध सर्वाधिक तक्रारी

डियाझ पूल क्लब ॲण्ड रेस्टॉरंट, हणजूण (५३ कॉल्स), नोवा गोवा, वझरांत-वागातोर (५१कॉल्स), थलसा, वाडी-शिवोली (२६ कॉल्स), बार हिफी, शापोरा-शिवोली (२५ कॉल्स), रियथ वझरांत-वागातोर (१७ कॉल्स) या त्या पाच रेस्टॉरंट्स व पब्सचा सर्वाधिक ध्वनिप्रदूषणसंदर्भातच्या तक्रारींमध्ये समावेश आहे.