मडगाव: रेल्वे स्थानक परिसरातील सुलभ शौचालयाजवळ ३५ वर्षीय व्यक्तीचा मृतदेह आढळून आला. स्थानक रोडवर बुधवारी (१५ ऑक्टोबर) सायंकाळी साडेपाच वाजता त्याचा मृतदेह आढळला. हा व्यक्ती भंगार गोळा करण्याचे काम करतो व सातत्याने दारुच्या नशेत असतो, अशी माहिती समोर आली आहे.

मडगाव पोलिसांनी दिलेल्या माहितीनुसार, बुधवारी सायंकाळी साडेपाच वाजता पोलिसांना एक फोन आला. रेल्वे स्थानक रोडवरील सुलभ शौचालयाजवळ अनोळखी व्यक्तीचा मृतदेह असल्याची माहिती त्यांना देण्यात आली. पोलिसांनी मृतदेह ताब्यात घेऊन दक्षिण गोवा जिल्हा रुग्णालयात दाखल केले.

रुग्णालयाने व्यक्तीचा मृत्यू झाल्याचे घोषित केले. समोर आलेल्या अधिकच्या माहितीनुसार, संबधित व्यक्ती या परिसरात भंगार गोळा करण्याचे काम करत होता. तो मद्याच्या आहारी देखील गेल्याची माहिती तपासात समोर आली.

मृत व्यक्तीचा मृतदेह दक्षिण गोवा जिल्हा रुग्णालयात वैद्यकीय आणि कायदेशीर तपासणीसाठी ठेवण्यात आला आहे. पोलिस उपनिरीक्षक शुभम गावकर याप्रकरणाचा अधिक तपास करत आहेत.