म्हापसा: बोडगिणी - म्हापसा येथे कार आणि दुचाकी याच्यात झालेल्या अपघातातील गंभीर जखमी दुचाकीस्वार उमेश महेंद्र कुमार (वय ३८, रा. म्हापसा व मूळ दिल्ली) यांचे बांबोळी येथील गोवा वैद्यकीय महाविद्यालय (गोमेकॉ) इस्पितळात उपचारादरम्यान निधन झाले.

सोमवारी (ता. २९) रात्री ११.१५ च्या सुमारास हा अपघात घडला होता. उमेश कुमार हा जीए ०३ एबी ३७०४ क्रमांकाच्या दुचाकीवरून मुख्य रस्त्यावर येत होता, तर जीए - ०७ - के - ६८८८ क्रमांकाच्या कारने जोयल टोनी रॉड्रिग्ज (रा. ताळगाव) हे म्हापशाहून पणजीच्या दिशेने जात होते.

यावेळी वाटेत बोडगिणी येथे कारची दुचाकीला धडक बसली. त्यामुळे रस्त्यावर कोसळून दुचाकीस्वार हा गंभीर जखमी झाला व त्याची शुध्द हरपली. जखमीला १०८ रुग्णवाहिकेतून प्रथम म्हापसा जिल्हा इस्पितळात व नंतर पुढील उपचारार्थ गोमेकॉत त्याला हलविण्यात आले. उपचार सुरू असताना बेशुध्दावस्थेतच त्याचा बुधवारी रात्री मृत्यू झाला.

पोलिस हवालदार शिवाजी शेटकर यांच्या तक्रारीच्या आधारे या अपघातास कारणीभूत कारचालक जोयल रॉड्रिग्ज याच्याविरुध्द म्हापसा पोलिसांनी निष्काळजीपणे वाहन हाकणे व सदोष मनुष्यवधाचा गुन्हा नोंद केला आहे. पुढील तपास पोलिस उपनिरीक्षक मंगेश पाळणी हे करीत आहेत.

दरम्यान, उमेश कुमार हा एसी मेकॅनिकचा व्यवसाय करत होता. पत्नी व मुलांसमवेत तो म्हापशात रहात होता. त्याच्या निधनामुळे त्यांच्या कुटुंबीयांवर दुःखाचा डोंगर कोसळला असून पत्नी व मुलांच्या उदरनिर्वाहाचा प्रश्न निर्माण झाला आहे. त्यामुळे त्याच्या निधनाबद्दल हळहळ व्यक्त होत आहे.