पणजी: उत्तर व दक्षिण गोवा अध्यक्षपदाच्या नावावर भाजप पक्ष संघटना ३० रोजी शिक्कामोर्तब करणार आहे. यासाठी सर्व संबंधितांची ३० रोजी बैठक बोलावल्याची माहिती प्रदेशाध्यक्ष सदानंद शेट तानावडे यांनी दिली.

उत्तर गोव्याचे अध्यक्ष सिद्धेश नाईक, दक्षिण गोव्याच्या अध्यक्ष सुवर्णा तेंडुलकर यांनी राजीनामा दिल्याने ही पदे रिक्त झाली आहेत. या पदांसाठी २ रोजी निवडणूक घेण्यात येणार आहे. दोन्ही जिल्हा पंचायतींवर भाजपची सत्ता असल्याने ही निवडणूक बिनविरोध केली जाणार आहे. त्यासाठीची नावांची निश्चिती पक्षीय पातळीवर केली जाणार आहे. पुढील वर्षी जिल्हा पंचायतीच्या निवडणुका होणार आहे. हे गृहित धरून या नावांवर शिक्कामोर्तब केले जाणार असल्याची माहिती मिळाली आहे.

उत्तर गोव्याच्या जिल्हा पंचायत अध्यक्षपदासाठी माजी मंत्री पांडुरंग मडकईकर यांचे बंधू धाकू आणि भाजप संघटनेच्या कार्यात अग्रेसर असणारे गिरीश उस्कैकर यांच्या नावांवर पक्षीय पातळीवर चर्चा सुरू झाली आहे. दक्षिण गोव्यात पंचायतमंत्री माविन गुदिन्होंच्या समर्थक अनिता थोरात आणि आदिवासी समाजातील संजना वेळीप यांच्या नावाची चर्चा आहे.