पणजी: पांडुरंग मडकईकर यांनी लाचखोरीसंदर्भात केलेला आरोप खोटा आहे. मुख्यमंत्री डॉ. प्रमोद सावंत यांच्या नेतृत्वाखालील सरकार पूर्णत: इमानदारीने काम करत असल्याचा निर्वाळा भाजपचे राष्ट्रीय सरचिटणीस तथा खासदार अरुणसिंह यांनी पत्रकार परिषदेत दिला.

खासदार अरुणसिंह म्हणाले, की देशातील प्रमुख राज्‍यांत संघटनात्मक काम पुढे गेले आहे. त्यात गोव्याचाही समावेश आहे. संघटनात्मक संरचना पूर्ण होत आली आहे. हे सारे वेगाने केल्याबद्दल सर्वांचे अभिनंदन करतो.

कार्यकर्त्यांचा नवा संच सर्व जबाबदाऱ्या यशस्वीपणे पेलेल. पंतप्रधानांना मॉरिशसचा सर्वोच्च नागरी पुरस्कार मिळाला आहे. आजवर २१ देशांनी सर्वोच्च नागरी पुरस्कार दिले आहेत. ते जगातील एकमेव नेते आहेत. पांडुरंग मडकईकर यांनी चुकीचा आरोप केला असून एका व्यक्तीच्या आरोपामुळे सरकारवर डाग लागत नाही.

जनतेला ठाऊक आहे, की सरकार इमानदार आहे. जनता वारंवार सरकार निवडून देते, याचा अर्थ सरकार इमानदार आहे. आम्ही जनतेसोबत आहोत. त्यांच्या आरोपात दम नाही. लोकशाहीत आपला मुद्दा जनतेसमोर ठेवण्याचा प्रत्येकाला अधिकार आहे. मात्र, सार्वजनिकरित्या कोणते वक्तव्य करावे आणि कोणते करू नये, याचे तारतम्य प्रत्येकाने बाळगले पाहिजे.

प्रदेशाध्यक्षांची चर्चा करणार : मडकईकर : लाचखोरीच्या आरोपामुळे वादात सापडलेले माजी मंत्री पांडुरंग मडकईकर यांच्याशी संपर्क साधला असता, आपण यावर काहीही प्रतिक्रिया देणार नाही. याबद्दल प्रदेशाध्यक्ष दामू नाईक यांच्याशी बोलणार असल्याचे त्यांनी स्पष्ट केले.

आरोप करणाऱ्यांचे काय करायचे? : पक्षात खल

प्रदेशाध्यक्ष दामू नाईक आणि खासदार सदानंद शेट तानावडे यांच्या उपस्थितीत भाजप कार्यालयात घेतलेल्या पत्रकार परिषदेत, माजी मंत्री कामासाठी पैसे दिल्याचा जाहीर आरोप करतो, तर सर्वसामान्यांचे काय, असा प्रश्न त्यांना केला असता अरुणसिंह म्हणाले, सर्वांना ठाऊक आहे, की त्यांनी केलेला आरोप खोटा आहे.

त्यांनी खुलेपणे खोटे वक्तव्य केले आहे. एका रुपयाचाही गैरव्यवहार झालेला नाही. असे आरोप करणाऱ्यांचे काय करायचे, यावर पक्षात विचार सुरू आहे.