पणजी : देशात सध्या पाच राज्यांमध्ये विधानसभा निवडणुका होत आहेत. मात्र या निवडणुकीत भाजपला पराभव दिसू लागलाय, त्यामुळे काँगेस नेत्यांचे फोन टॅप केले जात आहेत, असा गंभीर आरोप गोवा काँग्रेस प्रदेशाध्यक्ष गिरीश चोडणकर यांनी केला आहे. एका खासगी संस्थेमार्फत काँग्रेसच्या नेत्यांचे फोन टॅप केले जात असल्याचा आरोप चोडणकरांनी केला आहे. (Girish Chodankar News Updates)

नुकताच मी एका तज्ज्ञाला भेटलो होतो, त्याने आम्हाला सांगितलं की आमचे सर्वांचे फोन टॅप होत आहेत. आम्हाला सरकारने उत्तर द्यावं की आमची परवानगी न घेता फोन टॅप कसे केले. आमच्या गोपनीयतेचं हे उल्लंघन आहे. फोन टॅपिंगमध्ये सहभागी अधिकाऱ्यांनी हे तात्काळ थांबवावं, असा इशारा गिरीश चोडणकर (Girish Chodankar) यांनी दिला आहे.

गोव्यातील भाजप सरकारचे दिवस संपलेत, त्यामुळे अधिकाऱ्यांनी भाजपचं (BJP) ऐकू नये. आमचं सरकार आल्यावर आम्ही कडक कारवाई करु, असंही चोडणकर म्हणाले. आम्ही सर्व पक्षाच्या नेत्यांच्या संपर्कात आहोत, तसंच अनेक अपक्षही आमच्या संपर्कात आहेत. पुन्हा भाजपचं सरकार येणार नाही, त्यामुळे ज्यांना सत्तेत यायचंय ते आमच्या संपर्कात आहेत असा दावाही काँग्रेस (Congress) प्रदेशाध्यक्ष गिरीश चोडणकर यांनी केला आहे.