Goa Accident Death:

सुकेकुळण - धारगळ येथील राष्ट्रीय महामार्ग 66 च्या उड्डाण पुलावर आज दुपारी 3.15 वाजण्याच्या सुमारास झालेल्या स्वयं अपघातात पेंढराचीवाडी - वेंगुर्ला येथील संजय सुरेश जळवी (वय 48) यांचा जागीच मृत्यू झाला.

करासवाडा - म्हापसा येथील एका पेट्रोल पंपवर ते कामाला होते. दुपारी एमएच - 07- व्ही - 7161 या क्रमांकाच्या मोटारसायकलने ते वेंगुर्ला येथे आपल्या घरी जात असताना त्यांच्या मोटारसायकलची रस्त्याच्या बाजूच्या बॅरीकेटला धडक बसून पडल्याने ते जागीच ठार झाले.

पेडणे पोलिस स्थानकाचे उपनिरीक्षक योगेश मांद्रेकर व हवालदार प्रसाद तुयेकर यांनी पंचनामा करून मृतदेह वैद्यकीय तपासणीसाठी बांबोळी येथील गोमेकॉत पाठवला आहे.

टेंपोखाली सापडून बालक जखमी

मंगादो, खोर्ली - जुने गोवे येथे टेम्पोच्या चाकाखाली आल्याने दोन वर्षांचा मुलगा सत्विक गुंगी (मूळ कारवार, सध्या राहणार खोर्ली) हा गंभीर जखमी झाला. मुलाला गोमेकॉत उपचारासाठी दाखल केले असून त्याची प्रकृती चिंताजनक असल्याचे समजते.

जुने गोवे पोलिसांनी वाहनचालक मल्लिका अर्जुन (वय 23, खोर्ली) याच्याविरोधात गुन्हा नोंद केली आहे. पोलिसांनी दिलेल्या माहितीनुसार, सकाळी 10.35 च्या दरम्यान हा अपघात झाला.

मुलाची आई मुलाला सोबत घेऊन मंदागो - खोर्ली येथे चालत जात असता तेथे आलेल्या टेंपोसमोर (क्र. जीए - ०७ - एफ - ६३९७) तो अचानक धावला व टेंपोच्या चाकाखाली सापडला. अपघातानंतर त्याला खोर्ली येथील प्राथमिक आरोग्य केंद्रात नेण्यात आले, तेथून त्याला गोमेकॉत पाठवले गेले.

मुलाला अतिदक्षता विभागात ठेवेल असून त्याची प्रकृती चिंताजनक असल्याचे समजते. जुने गोवे पोलिस ठाण्याचे हवालदार प्रेमनाथ पार्सेकर यांनी गुन्हा नोंद करून वाहनचालकाची वैद्यकीय तपासणी करून त्याला ताब्यात घेतले आहे.