Goa Crime News: पर्वरी पोलिसांनी दुचाकी तसेच मोबाईल फोन चोरी करण‍ाऱ्या टोळीचा पदार्फाश करताना दोन युवकांना अटक केली. शब्बीर बळ्ळुर (२४, वेरे) व सुनील बी. के. (२२, कळंगुट व मूळ नेपाळ) अशी त्‍यांची नावे आहेत.

पोलिसांनी दिलेल्‍या माहितीनुसार, दोन दुचाकी चोरीला गेल्‍याच्‍या तक्रारी आल्‍या होत्या. त्‍यात होंडा हॉर्नेट (जीए ०७ वाय ७५११) व हिरो डिलक्स (केए ७१ एच ०७११) या वाहनांचा समावेश होता.

या दोन्ही वाहनांची किंमत १ लाख ६० हजार रुपये इतकी आहे. त्यानुसार, पर्वरी पोलिसांनी तपास चक्रे फिरवत वरील दोन्ही संशयितांना ताब्यात घेतले. त्यानंतर दोघांनी आपल्या गुन्ह्यात सहभाग असल्याची कबुली दिली.

पोलिसांनी संशयितांकडून दोन्ही चोरीला गेलेली वाहने तसेच आणखीन दोन मोटरसायल्‍स, सहा मोबाईल फोन जप्त केले. हा संपूर्ण मुद्देमाल ४ लाखांचा आहे. पोलिस निरीक्षक राहुल परब यांच्या मार्गदर्शनाखाली उपनिरीक्षक मंदार परब, कॉन्स्टेबल महादेव नाईक, उत्कर्ष देसाई, नितेश गावडे, योगेश शिंदे यांनी सापळा रचून चोरट्यांच्‍या मुसक्या आवळल्या.