Goa Police News: छत्तीसगड पोलिसांनी ऑनलाइन गेमिंग महादेव सट्टा अॅपवर कारवाई तीव्र केली आहे. याप्रकरणी पोलिसांना आणखी एक मोठे यश मिळाले. छत्तीसगडमधून फरार असलेला बुकी नवीन बत्रा याला गोवा पोलिसांनी अटक केली आहे. बत्रा हा बराच काळ फरार होता.

गोवा पोलिसांनी नुकतेच पर्वरी येथील एका हॉटेलमध्ये ऑनलाईन क्रिकेट सट्टेबाजीवर कारवाई केली. न्यूझिलंड विरुद्ध यूएई यांच्यातील T-20 सामन्यात येथे ऑनलाईन सट्टा स्विकारला जात होता. सट्टेबाजीसाठी वापरण्यात येत असलेले साहित्य या हॉटेलच्या खोलीतून जप्त करण्यात आले.

या वेळी पोलिसांनी नवीन बत्रा (छत्तीसगड) या फरार बुकीसह संजय सुब्बा (दिल्ली), करण राजेश पाटील (अकोला), अमित मोरे (अकोला), अंकित कुमार (झारखंड), वरिंदर सिंग एन., सूरज नागदेव, किशन पोपटनी, तिलेश कुमार कुर्रे, श्रेय शर्मा एन. (सर्व छत्तीसगड) व आशिष एन. (राजस्थान) यांना अटक केली होती.

रायपूर पोलिस बत्रा याला ताब्यात घेणार आहेत. नवीन बत्रा हा छत्तीसगडचा मोठा बुकी आहे. नवीन हा महादेव हे ऑनलाइन अॅपचे चार पॅनल चालवतो. सूरजपूरमधील व्यावसायिकाच्या आत्महत्येशिवाय रायपूरमध्येही नवीनवर गुन्हा दाखल करण्यात आला आहे.

बत्रा हा ऑनलाइन सट्टेबाजी अॅपमधील एक मोठा किंगपिन मानला जातो. त्याचे कनेक्शन दुबईपर्यंत असल्याचे बोलले जाते.