Vermicompost Training :

वाळपई, गोवा राज्य ग्रामीण उपजीविका अभियानच्या सहकार्याने गोवा कृषी महाविद्यालय, जुने गोवे येथे सत्तरी व डिचोली तालुक्यातील महिला बचत गटांसाठी एकदिवसीय गांडूळ खत प्रशिक्षण कार्यक्रम आयोजिला होता.

या कार्यक्रमास गोवा कृषी महाविद्यालयाचे प्राचार्य डाॅ. सुरेश कुंकळीकर, उत्तर गोवा जिल्हा ग्रामीण विकास संस्थेचे व्यवस्थापक आशिष नाईक, गोवा कृषी महाविद्यालयाचे साहाय्यक प्राध्यापक डाॅ. गोविंद परब उपस्थित होते.

यावेळी आशिष नाईक म्हणाले, गोवा राज्य ग्रामीण विकास मिशनच्या उपक्रमांची माहिती दिली. प्रा. सलोनी पाटील यांना गांडूळ खत तयार करण्याची क्रिया सांगितली. जिल्हा व्यवस्थापक मंदार गावस यांनी गोवा कृषी विभाग व इतर सरकारी योजनांबद्दल माहिती दिली. आभार साहाय्यक प्राध्यापक अक्षया कळगुंटकर यांनी मानले. यावेळी प्रशिक्षण कार्यशाळेत सहभागी झालेल्या महिलांना प्रशस्तिपत्रक प्रदान करण्यात आले.

महिलांना स्वयंपूर्ण बनविणार

प्रा. डाॅ. सुरेश कुंकळीकर म्हणाले की, महिला बचत गटांनी गांडूळ खतनिर्मिती करावी, यासाठी आमचे सदैव सहकार्य लाभेल. हे खत आम्ही खरेदी करणार असून महिलांना स्वयंपूर्ण बनविण्याचा उद्देश आहे. घरच्या घरी गांडूळ खत तयार करण्याची सोपी पद्धत आहे. रासायनिक खताऐवजी सेंद्रिय पद्धतीने तयार केलेले गांडूळ खत भाजीपाल्यासाठी उपयुक्त असते. त्यामुळे त्याला बाजारपेठेत मोठी मागणी आहे. त्यामुळे या प्रशिक्षणाचा फायदा करून घेतला पाहिजे.