डिचोली: पावसाच्या तडाख्यात एकीकडे दिवसभर वीज ‘गुल’ झाली असतानाच डिचोलीत पाणीपुरवठाही ठप्प झाला. परिणामी, डिचोलीतील विविध भागांतील नागरिकांची मोठी गैरसोय झाली. पहाटेपासून खंडित झालेला वीजपुरवठा सायंकाळी पूर्ववत झाला; मात्र पहाटेपासून रात्री उशिरापर्यंत नळ कोरडेच राहिले.

वीजपुरवठ्यात बिघाड झाल्याने पडोसे जलशुद्धीकरण प्रकल्पातील पाणीपुरवठाही पहाटेपासून पूर्णपणे ठप्प झाला होता. त्यामुळे या प्रकल्पातून पाणीपुरवठा होणाऱ्या डिचोलीतील विविध भागांमध्ये मोठी पाणीटंचाई निर्माण झाली. शुक्रवारी पहाटेपासूनच नळ कोरडे पडल्याने नागरिकांना मोठ्या अडचणींचा सामना करावा लागला. रात्री उशिरापर्यंत अनेक भागांत पाणीपुरवठा सुरळीत झाला नव्हता.

मिळालेल्या माहितीनुसार, गुरुवारी रात्री झालेल्या मुसळधार पावसामुळे न्हावेली वीज उपकेंद्रात मोठा बिघाड झाला. त्यामुळे त्या वीज साखळीवर अवलंबून असलेल्या भागांमध्ये पहाटेपासून वीजपुरवठा खंडित झाला होता. वीज नसल्याने पाणीपुरवठा यंत्रणाही बंद पडली आणि त्याचा थेट परिणाम नागरिकांवर झाला. रात्री उशिरापर्यंत नळ कोरडे राहिल्याने गृहिणींचे अक्षरशः हाल झाले. एकीकडे वीज नसल्याने असह्य उकाडा, तर दुसरीकडे पाण्याअभावी दैनंदिन कामे ठप्प झाल्याने नागरिक, विशेषतः गृहिणी, हैराण झाल्या होत्या.