डिचोली, आतीलपेठ - डिचोली येथील शिमगोत्सवाचे वैशिष्ट्य आणि आकर्षण असलेला ‘वीरभद्र उत्सव’ उद्या (रविवारी) साजरा होणार आहे. टाळ मृदंगाच्या ठेक्यावर आणि ‘धिन्ना था थय्या धिन्ना थय्या’च्या तालावर होणारे ‘वीरभद्र’ नृत्य’ पाहण्यासाठी यंदाही डिचोलीत गर्दी उसळण्याची शक्यता आहे.
डिचोलीतील आतीलपेठ येथील श्री शांतादुर्गा मठ मंदिर देवस्थानच्या शिमगोत्सवातील वैशिष्ट्य आणि प्रमुख आकर्षण असलेल्या ‘वीरभद्र’ उत्सवाला सांस्कृतिक परंपरा आणि मोठा वारसा आहे. दरवर्षी धुळवडीच्या पूर्वरात्री ‘वीरभद्र’ साजरा करण्यात येतो. यंदा हा उत्सव भायलीपेठ महाजन आणि बाजारकर दहाजण मंडळातर्फे साजरा करण्यात येणार आहे.
रात्री ९ वाजण्याच्या सुमारास ‘वीरभद्र’ साकारलेल्या व्यक्तीला विशिष्ट्य पद्धतीने सजविल्यानंतर कायरो हॉस्पिटल समोरील जंक्शनवर गाऱ्हाणे अर्थातच नमन झाल्यानंतर ‘वीरभद्र’ उत्सवाला प्रारंभ होणार आहे.
मठ मंदिरात आगमन होताना वीरभद्राची नजर देवीच्या नजरेशी एकरूप होणार नाही याची काळजी घेण्यात येते. तसेच सज्ज्याखाली येताच अवसर संचारून वीरभद्र आक्रमक होताच त्याला नियंत्रणात आणण्यात येते. वीरभद्र नृत्य झाल्यानंतर मठ मंदिरात नाट्यप्रयोग होणार आहे. सोमवारी (ता. ८) सकाळी कौलोत्सव आणि सायंकाळी धुलीवंदन होवून शिमगोत्सवाची सांगता होणार आहे.
पखवाज आणि झांजच्या ठेक्यावर नृत्य
पखवाज आणि झांजच्या ठेक्यावर आणि ‘धिन्ना था थय्या धिन्ना थय्या’च्या तालावर हातात तलवारी घेतलेल्या वीरभद्राचा थयथयाट सुरू होणार आहे.
वाटेत गवताला लावलेली आग ओलांडून मार्गक्रमण करीत वीरभद्राचे मठ मंदिरात आगमन झाल्यानंतर देवीच्या सज्ज्याखाली येताच अवसररूपी वीरभद्राला उचलून रंगमंचावर नेण्यात येते. श्री देवी शांतादुर्गेचे तीर्थ तोंडात घातल्यानंतर वीरभद्राच्या अंगात संचारलेला अवसर निवळतो आणि मग या उत्सवाची सांगता होते.
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.