पावसाळा जवळ आल्याने सध्या डिचोलीत प्रत्येकजण पुरूमेंताच्या वस्तू खरेदी करण्यात व्यग्र असून, सुक्या मासळीच्या खरेदीलाही जोर आल्याचे दिसून येत आहे. समुद्रातील ताज्या मासळीची निर्माण होणारी अनुपलब्धता त्यातच या मासळीचे दरही आवाक्याबाहेर गेल्याने सध्या सुक्या मासळीला चांगले दिवस आले आहेत.

डिचोलीतही सध्या सुक्या मासळीला तेजी आली आहे. स्थानिक मासळीसह राज्याबाहेरूनही सुकी मासळी विक्रीस उपलब्ध होत असली, तरी स्थानिक सुक्या मासळीला खवय्यांची अधिक पसंती असल्याचे दिसून येते. पावसाळ्यात आवश्यक तेवढी सुक्या मासळीची बेगमी करण्यात बाजारात आज खवय्ये मग्न असल्याचे दिसून येत होते.

मागणी असली, तरी त्यामानाने सुक्या मासळीचे दर अजून तरी परवडण्यासारखे आहेत. सुके बांगडे आकाराप्रमाणे100 रुपयांना 8 ते 10 नग, सुकी सुंगटे 100 ते 200 रु. पड, गालमा 50 ते 100 रुपये पड, खारी 100 ते 200 रुपये वाटा असे सुक्या मासळीचे दर आहेत. पावसाळा जवळ आल्याने सध्या सुक्या मासळीला मागणी आहे. असे या विक्रेत्यांचे म्हणणे आहे.पावसाळा सुरू होईपर्यंत बाजारात सुक्या मासळीला मागणी असणार आहे, असे काही विक्रेत्यांनी सांगितले.

सुक्या मासळीचा खास बाजार

क्वचित अपवाद सोडल्यास डिचोली बाजारात नियमित सुकी मासळी उपलब्ध होत नाही. डिचोलीत बुधवारी तर साखळीत सोमवारी आठवडी बाजाराच्या दिवशी खास सुक्या मासळीचा बाजार भरत असतो. तर आज (सोमवारी) दोन्ही शहरातील आठवडी बाजाराच्या दिवशी सध्या मोठ्या प्रमाणात सुकी मासळी विक्रीस उपलब्ध होत आहे. पावसाळा जवळ आल्याने खरेदीही जोरात सुरू आहे.