Bicholim Garbage Problem : कारापूर-सर्वण पंचायत क्षेत्रात पुन्हा कचऱ्याच्या समस्येने डोके वर काढले आहे. काही ठिकाणी रस्त्याच्या कडेला उकिरड्याचे स्वरूप आले आहे.

विशेष म्हणजे, पंचायतीतर्फे घरोघरी कचऱ्याची उचल होत असूनही उघड्यावर कचरा टाकण्याचे प्रकार सुरूच आहेत. उघड्यावर कचरा टाकणाऱ्यांवर पंचायतीने दंडात्मक कारवाई करावी, अशी जनतेची मागणी आहे.

कारापूर-तिस्क, कुळण, गोकुळवाडा, न्यू वाडा, सर्वण आदी भागांत कचऱ्याची समस्या आहे. तेवढ्यापुरती साफसफाई केली, की काही दिवस हा परिसर स्वच्छ दिसून येतो.

नंतर पुन्हा कचऱ्याची समस्या डोके वर काढते. हा कचरा कोठून येतोय आणि कोण टाकतो, त्याबद्दल गूढ निर्माण झाले आहे.

सर्वण रस्त्यावरील उतरणीलगत गेल्या काही वर्षांपासून कचरा टाकण्याचे प्रकार घडत आहेत. या रस्त्यावरून ये-जा करणारे सर्रास याठिकाणी कचरा टाकतात. तीन वर्षांपूर्वी पंचायतीने कारवाई करण्याचा इशारा देताच या प्रकारावर नियंत्रण आले होते.

एक वर्षापूर्वी येथील झाडेझुडपे छाटली होती. मात्र, पुन्हा सर्वण येथील त्या जागेला उकिरड्याचे स्वरूप आले आहे.

सूचना फलक गायब

डिचोली-साखळी या मुख्य रस्त्याला जोडून सर्वण गावाकडे जाणाऱ्या अंतर्गत रस्त्याच्या बाजूला कचरा टाकण्याचे प्रकार वाढले आहेत. यामुळे असह्य दुर्गंधी पसरली आहे. त्यामुळे या मार्गावरील प्रवाशांना त्रास होत आहे.

सर्वण रस्त्याच्या उतरणीवर तर सध्या प्लास्टिकचा कचरा मोठ्या प्रमाणात साचला आहे. आश्चर्याची बाब म्हणजे, याठिकाणी पंचायतीने लावलेला सूचना फलकही गायब झाला आहे.