फोंडा: बोणबाग, बेतोडा येथील रुबिना मंझिल या इमारतीत गुरुवारी मध्यरात्री चोरट्यांनी चोरी करून रोख रकमेसह सुमारे तीन लाखांचा ऐवज लंपास केला. शुक्रवारी सकाळी चोरीचा हा प्रकार उघडकीस आला.

बोणबाग येथील रुबिना मंझिल या दोन मजली इमारतीत ही धाडसी चोरी करण्यात आली आहे. या इमारतीतील कुटुंबीय तळमजल्यावर काल रात्री झोपले होते.

या इमारतीवर पाळत ठेवून असलेल्या चोरट्यांनी पहिल्या मजल्यावर येऊन बाजूला लावलेल्या चाव्या काढून खोल्या उघडल्या आणि आतील कपाटातील रोख रुपये २० हजार तसेच सोन्याच्या साखळ्या व इतर सोन्याचे दागिने मिळून सुमारे तीन लाखांचा ऐवज लंपास केला.

सीसीटीव्ही फुटेजमध्ये या इमारतीच्या मागच्या बाजूला एक चोरटा हातात लोखंडी सळी घेऊन वावरत असल्याचे दिसले आहे. चोरी एकट्याने केली की आणखी कुणी होते, याबाबत काहीच समजू शकले नाही.

चोरीची तक्रार दिल्यानंतर फोंडा पोलिसांनी त्वरित घटनास्थळी धाव घेऊन तपास सुरू केला. यावेळी फॉरेन्सिक पथकाला पाचारण करण्यात आले.

सीसीटीव्ही फुटेज तपासण्यात आली, मात्र चोरटे अजून सापडलेले नाहीत. पोलिस याप्रकरणी अधिक तपास करीत आहेत.

दोन महिन्यांत पाच चोऱ्या!

दरम्यान, फोंड्यात चोऱ्यांचे सत्र सुरूच असून मागच्या दोन महिन्यांत चार घरफोड्या झाल्या आहेत. आता ही पाचवी चोरी असून फोंडा पोलिसांनी रात्रीची गस्त वाढवावी, अशी मागणी फोंडावासीयांकडून करण्यात येत आहे.