मुरगाव पत्तन प्राधिकरणाने जेव्हापासून धक्का क्र: १० व ११ चे खासगीकरण केले, तेव्हापासून सर्वसामान्य व्यावसायिकांचे हाल होत आहेत. ‘एमपीए’ने आता संपूर्ण बंदराचे खासगीकरण करण्याचा घाट घातला असून आमचा त्याला विरोध असल्याचे ‘एमपीए’मधील स्टीव्हडोअर संघटना, हाताळणी एजंट, कामगार कंत्राटदार संघटना, टिप्पर ट्रकमालक संघटनेच्या पदाधिकाऱ्यांनी पत्रकार परिषदेतून केला.

पत्रकार परिषदेत भवानी शिपिंगचे एस.पी. त्रिपाठी म्हणाले की, बंदराचे खासगीकरण पूर्णत: बेकायदेशीर आहे. खासगीकरण करायचे होते तर धक्का क्र: ९ चे करायला हवे होते. धक्का क्र: १० व ११ खासगी कंपनीला देऊन एकप्रकारे एमपीएने आमच्या विरोधात षडयंत्र रचले आहे.

आम्हाला सहकार्य करण्यासाठी मुरगावचे आमदार संकल्प आमोणकर पुढाकार घेत असताना त्यांच्या बदनामीचे षडयंत्र रचले जात असल्याचा आरोप त्रिपाठी यांनी केला.वसीम शेख म्हणाले की, आम्ही अनेक वर्षांपासून बंदरातील माल हाताळत आलो आहे.

ट्रक व्यावसायिकांचेही हाल

संबंधित कंपनीने धक्का क्र: १० व ११ वर दहाचाकी ट्रक माल हाताळणीसाठी आणल्यास याचा आमच्या वाहतुकीला अडथळा निर्माण होणार असल्याची माहिती टिप्पर ट्रकमालक संघटनेचे हेमंत शेटगावकर यांनी दिली. नितीन पालकर यांनी सांगितले की, धक्का क्र: १० व ११ चे खासगीकरण केल्यामुळे आम्हाला व्यवसाय मिळणे कठीण झाले आहे.

बदनामीचे कट-कारस्थान

आमचा ‘एमपीए’च्या खासगीकरणाला तीव्र विरोध असून, याविषयी आम्ही मुख्यमंत्र्यांना निवेदन दिले आहे. आम्ही बंदरातील कोणत्याही मालाची हाताळणी रोखलेली नाही. फक्त आमची पूर्वीची बिले न दिल्याने हे पाऊल उचलावे लागले. यात आमची बदनामी करण्याचे षडयंत्र एक कंपनी करत असल्याचा दावा वासीम शेख यांनी केला आहे.