मडगाव: बाणावली येथील वासवाडो भागातील एका फ्लॅटमध्ये सुरू असलेल्या ऑनलाईन जुगाराचा कोलवा पोलिसांनी पर्दाफाश केला. या कारवाईत तीन जुगाऱ्यांना रंगेहाथ पकडून त्यांच्या ताब्यातील सुमारे २.६० लाख रुपयांचा मुद्देमाल जप्त करण्यात आला.

ही कारवाई २४ रोजी रात्री साडेदहा ते २५ रोजी पहाटे दीड वाजण्याच्या दरम्यान करण्यात आली. सनी तेलंग (३०, मूळ रा. अहमदाबाद, गुजरात), राहुल पटेल (३३, मूळ रा. अहमदाबाद) आणि तेजसकुमार दबगर (३६, मूळ रा. मेहसाणा, गुजरात) यांना अटक करण्यात आली. शनिवारी त्यांना न्यायालयात हजर केले असता जामिनावर त्यांची सुटका करण्यात आली. या प्रकरणी संशयितांविरुद्ध जुगार प्रतिबंधात्मक कायद्याखाली गुन्हा नोंद करण्यात आला आहे.

दरम्यान, कोलवा पोलिस ठाण्याचे पोलिस निरीक्षक विक्रम नाईक यांच्या मार्गदर्शनाखाली पोलिस उपनिरीक्षक प्रशांत भगत, पोलिस कर्मचारी मंजू वांतामुरी, हवालदार रोहन नाईक आणि पोलिस कॉन्स्टेबल निखिल नाईक यांनी ही कारवाई केली.

सापळा रचून छापा

बाणावलीतील ‘ऐरा सलून अँड स्पा’च्या वरील इमारतीतील फ्लॅट क्रमांक २ मध्ये बेकायदेशीर ऑनलाईन जुगार सुरू असल्याची माहिती कोलवा पोलिसांना मिळाली होती. त्यानुसार पोलिसांनी सापळा रचून धाड टाकली आणि संशयितांना ताब्यात घेतले. यावेळी दोन लॅपटॉप, पाच मोबाईल फोन तसेच ऑनलाईन जुगारासाठी वापरले जाणारे इतर साहित्य जप्त करण्यात आले.