बाणावलीचे माजी आमदार चर्चिल आलेमाव (Churchill Alemao) यांच्या विरोधात एक व्हिडिओ सोशल मिडियावर प्रसिद्ध करण्यात आला आहे. यात पुलाच्या कामात आलेमाव यांनी पैसे घेतल्याचा आरोप करण्यात आला आहे. व्हिडिओ फेसबुकवर प्रसिद्ध करण्यात आल्यानंतर चर्चिल यांनी पोलिसांत धाव घेत तक्रार दाखल केली.

कोलवा पोलिसांनी संबधित व्यक्तीला आक्षेपार्ह व्हिडिओ टाकल्याप्रकरणी अटक केली आहे.

आक्षेपार्ह व्हिडिओ टाकल्याप्रकरणी जेफ्री फर्नांडिस याला कोलवा पोलिसांनी अटक केली आहे. पोलिसांनी फौजदारी संहितेच्या कलम 151 कलमाखाली गुन्हा दाखल केला आहे.

व्हिडिओ काय आहे?

जेफ्री फर्नांडिस याने फेसबुकवर एक व्हिडिओ प्रसिद्ध केला आहे. बाणावली येथील पुलाच्या कामाबाबत चर्चिल आलेमाव यांनी पैसे घेतले होते, आता या पुलाला भेगा पडल्या आहेत. असा आरोप संशयित फर्नांडिस याने व्हिडिओच्या माध्यमातून केला आहे.

व्हिडिओ सर्वत्र व्हायरल झाल्यानंतर चर्चिल आलेमाव यांनी तात्काळ कोलवा पोलीस ठाण्यात धाव घेतली. त्यानुसार पोलिसांनी जेफ्री फर्नांडिस याला अटक केली आहे.