Sirsaim By-Poll Election Result: बार्देश तालुक्यातील शिरसई ग्रामपंचायतच्या प्रभाग क्रमांक 5 च्या पोटनिवडणुकीचा आज सोमवार (29 जानेवारी) निकाल जाहीर झाला आहे. सकाळी 8 वाजल्यापासून बार्देश तालुक्याच्या अधिसूचित केंद्रात मतमोजणीला सुरुवात झाली. या प्रभागातून तेजा राजेश कांदोळकर सर्वाधिक मतांनी विजयी ठरल्या आहेत.

यावेळी विजयी उमेदवार तेजा कांदोळकर यांनी माध्यमांशी संवाद साधला. त्या म्हणाल्या की, 'मला निवडून आणण्यासाठी मी सर्व मतदारांची, माझे कुटुंब आणि मित्रमंडळींची आभारी आहे. यापुढे प्रभागासाठी काम करताना मी प्रामुख्याने महिला सक्षमीकरणावर भर देणार आहे. पंचायतीतर्फे ज्या योजना राबवल्या जातात; त्या बहुदा अनेकांपर्यंत पोहोचत नाहीत, त्या योजना शेवटच्या व्यक्तीपर्यंत पोहोचण्यासाठी प्रयत्न करणार असून सामाजिक कार्यातही मी तत्पर राहणार आहे.'

काल रविवारी (28 जानेवारी) रोजी सरकारी शाळेत मतदान पार पडले. या निवडणुकीसाठी एकूण तीन उमेदवार रिंगणात होते. यामध्ये तेजा कांदोळकर यांना 123, रुपम कुडणेकर यांना 77 तर ग्रीष्मा कांबळी यांना 63 मते प्राप्त झाल्याचे मतदान अहवालातून स्पष्ट झाले. महिलांसाठी आरक्षित असलेल्या या प्रभागात एकूण 77.43 टक्के मतदान झाले.