Banastarim Mercedes Accident: बाणस्तारी येथील पुलावर झालेल्या मर्सिडीज कारच्या अपघात प्रकरणाचा तपास गोवा सरकार क्राईम ब्रँचकडे देण्याची शक्यता असल्याची माहिती सरकारी वकिलांनी मुंबई उच्च न्यायालयाच्या गोवा खंडपीठात गुरूवारी दिली.

त्यामुळे या मर्सिडीज कार चालक संशयित श्रीपाद ऊर्फ परेश सावर्डेकर याच्या जामीन अर्जावरील सुनावणी गोवा खंडपीठाने सोमवारपर्यंत तहकूब केली.

दरम्यान, मर्सिडीस कारची मालक मेघना सिनाय सावर्डेकर हिच्या अटकपूर्व जामीन अर्जावरील सुनावणी फोंडा येथील अतिरिक्त जिल्हा व सत्र न्यायालयाने 23 ऑगस्टपर्यंत पुढे ढकलली आहे. तर सुमारे 8 दिवस पोलिस कोठडीत राहिल्यानंतर न्यायालयाने त्याला 14 दिवसांची न्यायालयीन कोठडी दिली आहे.

कुंभारजुवेचे आमदार राजेश फळदेसाई यांनी हा तपास क्राईम ब्रँचकडे देण्याची मागणी केली होती. ती मुख्यमंत्री डॉ. प्रमोद सावंत यांनी मान्य केली.

पोलिसांनी त्याच्या जामिनाला उच्च न्यायालयात विरोध दर्शविला आहे. तपास अद्याप पूर्ण झालेला नाही. काहींच्या साक्षी नोंदवायच्या आहेत. संशयित राजकीयदृष्ट्या वजनदार व्यक्ती असल्याने साक्षीदारांवर दबाव टाकू शकतो, असे पोलिसांनी म्हटले होते.