सासष्टी: पंचायतीत गत ११ महिन्यांत ११ सचिवांची बदली झाली. आपल्या सरपंचपदाच्या कारकिर्दीतच चार सचिव झाले. हे सचिव एक दिवस येतात नंतर त्यांची बदली केली जाते. त्यामुळे पंचायतीच्या कारभारावर विपरित परिणाम होत आहे, असे सरपंच हर्षद परीट यांनी सांगितले.

या सचिव बदलीचे पडसाद रविवारच्या ग्रामसभेत उमटले. गेल्या कित्येक ग्रामसभांच्या इतिवृत्तांना मंजुरी देण्यात आलेली नाही. त्यामुळे स्थानिकांनी रविवारची ग्रामसभा पुढे ढकलण्याचा आग्रह धरला व सरपंचांनी ती पुढे ढकलल्याचे जाहीर केले.

जोपर्यंत कायमस्वरूपी सचिवांची नियुक्ती होत नाही व गत अनेक ग्रामसभांचे इतिवृत्तांत सादर होत नाहीत, तोपर्यंत ग्रामसभा होऊ देणार नाही, असे स्थानिकांनी यावेळी जाहीर केले.

भिकू वेळीप म्हणाले की, पंचायतीत काहीच कामे होत नाहीत, गावकऱ्यांना पाण्यासाठी वणवण करावी लागते, कचरा व्यवस्थापनाचा अभाव आहे.