मडगाव: मुगाळीतील रामनगरी जंक्शनवर एका माणसाकडून बॅग हिसकावून घेत, त्याच्या अंगावर थुंकत सराईतपणे पसार झालेल्या आरोपीला पोलिसांनी अटक केली आहे आणि निवाड्यात मडगाव न्यायालायने त्याला ९० दिवसांची शिक्षा ठोठावली आहे.

आरोपी आगुस्तिन कार्व्हालो याने मुगाळी भागातील भगवती कॉलनीनजीक रामनगरी जंक्शनवर ही चोरी केली होती. हा एकूण प्रकार २४ जून २०२४च्या दिवशी घडला होता. तक्रारदार रामनगरी जंक्शनवर थांबला असता आरोपीने प्रकाश निदोनीच्या हातातील बॅग हिसकावून घेत, त्याच्या अंगावर थुंकत पळ काढला होता.

या बॅगमध्ये एकूण ४० हजार रुपये होते. तक्रारदार प्रकाश निदोनी यांनी स्थानिक पोलीस स्थानकात तक्रार नोंदवली असता आरोपीच्या विरुद्ध चोरीचा गुन्हा दाखल करण्यात आला होता.

गुन्ह्याची नोंद झाल्यानंतर मडगाव पोलीस उपअधीक्षक यांच्यासह मायना कुडतरी पोलीस निरीक्षक यांच्या मार्गदर्शनाखाली पोलीस उपनिरीक्षक संकेत नाईक हे या प्रकरणाचा शोध घेत होते.

पोलिसांना मिलेल्या माहितीनुसार आरोपी आगुस्तिन कार्व्हालो हा एक अट्टल चोर आहे आणि त्यांच्या विरुद्ध यापूर्वी २० गुन्हे नोंद झाले आहेत तर २५ प्रकरणांत त्याला अटक देखील झालीये. चोरी किंवा सोन्याच्या साखळ्या लुबाडण्याचे गुन्हे त्याच्या नावे नोंद झालेत, त्याला यापूर्वी मडगावमधून हद्दपार देखील करण्यात आलं होतं.

या नवीन प्रकरणात त्याने स्वतः चोरीची कबुली दिली आहे आणि जबरदस्ती तसेच चोरी केल्याप्रकरणी न्यायालयाने त्याला ९० दिवसांची कोठडी सुनावलीये, तसेच त्याने याआधी भोगलेल्या कारावासाचा अवधी कमी करण्याचे न्यायालयीन आदेशात नमूद करण्यात आले आहे.