पणजी : गोव्यात सुरु असलेल्या काँग्रेसमधील नाराजीनाट्यावर आता काँग्रेसमधून भाजपवासी झालेले पणजीचे आमदार आणि महसूलमंत्री बाबूश मोन्सेरात यांनी पहिली प्रतिक्रिया दिली आहे. भाजप हा मोठा पक्ष असून ज्यांना पक्षात यायचं असेल त्यांचं स्वागत आहे, असं वक्तव्य मोन्सेरात यांनी केलं आहे. एकाप्रकारे अप्रत्यक्षपणे बाबूश यांनी काँग्रेस आमदारांना पक्षात येण्याचा आमंत्रण दिल्याचं आता दिसू लागलं आहे.

गेल्या काही दिवसांपासून गोव्यात तुफान पाऊस सुरु आहे. त्यामुळे अनेक ठिकाणी पडझड होऊन जनजीवन विस्कळीत झालं होतं. आता नुकसानग्रस्त गोवेकरांच्या मदतीसाठी महसूलमंत्री बाबूश मोन्सेरात यांनी हात पुढे केला आहे. गोव्यात अनेक ठिकाणी, घरांवर झाडे पडून तसेच, घराच्या भिंती कोसळण्याच्या घटना घडल्या, ज्यात गोवेकरांचं मोठं नुकसान झालं आहे. या सर्व नुकसानग्रस्तांना उपाय म्हणून महसूलमंत्री बाबूश मोन्सेरात यांनी मदत करण्याचे आश्वासन दिलं आहे.

दुसरीकडे आपण काँग्रेसच्या तिकीटावर निवडून आलो असून अजूनही काँग्रेससोबतच असल्याचा दावा लोबो यांनी केला आहे. मात्र काँग्रेसकडून बैठकांवर बैठका घेतल्या जात असून आपल्याला पदावरुन दूर केल्याचंही मायकल लोबोंनी स्पष्ट केलं आहे. तसंच सरकारमधील मंत्र्यांकडून आपल्यावर गंभीर स्वरुपाचे आरोप केले जात असून आपल्यावर कारवाईही केली जात आहे. अशा परिस्थितीत आपण विरोधी पक्षनेतेपदी राहणं कठीण असल्याचं पक्षनेतृत्त्वाला कळवल्याचंही लोबोंनी स्पष्ट केलं आहे.

तर मी काँग्रेसमध्येच मी रिटायर्ड हर्ट असलो तरी काँग्रेस सोडण्याचा प्रश्नच येत नाही पाठीमागच्या विधानसभेवेळी मी एकटा आमदार उरलो होतो. त्यामुळे पार्टी सोडण्याचा विषय येत नाही, अशी प्रतिक्रिया ज्येष्ठ काँग्रेस नेते दिगंबर कामत यांनी दिली आहे.