पणजी: निवडणूक लढविण्याचा अधिकार प्रत्येकाला आहे. कोणालाही निवडणूक लढविण्यापासून आपण रोखू शकत नाही. मात्र, सांताक्रूझ मतदारसंघात भाजपचाच उमेदवार विजयी होईल. भाजप ज्याला उमेदवारी देईल, त्या उमेदवाराला आपण पाठिंबा देऊ, असे मंत्री बाबूश मोन्सेरात यांनी आज स्पष्ट केले.

सांताक्रूझ मतदारसंघात मोन्सेरात यांनी स्वतःचे कार्यालय सुरू केल्याने या विषयाला राजकीय रंग आला आहे. त्यांच्या या निर्णयावर स्थानिक आमदार रुडॉल्फ फर्नांडिस यांनी जोरदार टीका केली होती. तसेच हा विषय मुख्यमंत्री डॉ. प्रमोद सावंत यांच्या निदर्शनासही आणून दिला होता.

यापूर्वी मोन्सेरात यांनी हे पक्षाचे कार्यालय असल्याचे जाहीर केले होते. मात्र, त्यावरून चर्चा सुरू झाल्यानंतर आणि रुडॉल्फ फर्नांडिस यांनी नाराजी व्यक्त केल्यानंतर त्यांनी हे आपले कार्यालय असल्याचे स्पष्ट केले.

सांताक्रूझमधील भाजपच्या उमेदवारीबाबत मोन्सेरात म्हणाले की, आपण भाजपचाच एक भाग आहोत. पक्षाने ज्याची उमेदवार म्हणून निवड केली असेल, त्याच्या पाठीशी आपण ठामपणे उभे राहू. रुडॉल्फ फर्नांडिस यांच्या उमेदवारीबाबत मात्र त्यांनी बोलण्यासनकार दिला.