पणजी: विदेशी नागरिक असलेल्या अल्पवयीन मुलीवरील बलात्कारप्रकरणी पर्वरी पोलिसांनी संशयित योगेश मांद्रेकर या तरुणाविरुद्ध गुन्हा दाखल करून त्याला अटक केली आहे. म्हापसा न्यायालयाने त्याला दोन दिवसांची पोलिस कोठडी दिली आहे. ही घटना काही महिन्यांपूर्वी घडली असून, मुलीने हल्लीच तिच्या आईला सांगितल्यानंतर दाखल झालेल्या तक्रारीनंतर ही कारवाई करण्याची आल्याची माहिती पोलिस निरीक्षक अनंत गावकर यांनी दिली.

पर्वरी पोलिसांनी दिलेल्या माहितीनुसार पीडित मुलीची आई ही विदेशी नागरिक असून तिने एका ओडिशा तरुणाशी विवाह केला होता. पती तिच्यापासून दूर झाला होता.

संशयित योगेश मांद्रेकर याची या महिलेशी ओळख झाली होती. त्यामुळे पर्वरी येथे राहत असलेल्या या महिलेच्या घरी येणे - जाणे होते. त्यातूनच अल्पवयीन मुलीचे त्याने लैंगिक शोषण केले. ही घटना नोव्हेंबर 2021 मध्ये घडली होती. काही दिवसांपूर्वी पीडित मुलीने त्याची माहिती आईला दिल्यावर तिने पर्वरी पोलिस स्थानकात तक्रार दाखल केली होती. तक्रारीनुसार म्हापसा येथील योगेश मांद्रेकर याला अटक करण्यात आली. पीडित मुलगी व संशयितांची वैद्यकीय तपासणी केली जाणार असल्याची माहिती पोलिसांनी दिली.

या प्रकरणाचा तपास पर्वरीच्या महिला पोलिस उपनिरीक्षक करत आहेत. संशयित योगेश मांद्रेकर याच्याविरुद्ध बलात्कार, पोक्सो कायदा तसेच बाल कायद्याखाली गुन्हा दाखल केला आहे.