म्हापसा: अस्नोडा येथे रविवारी सायंकाळी ७.३० च्या सुमारास झालेल्या अपघातात दीपेश मांद्रेकर (वय ३७, अस्नोडा) या युवकाचा दुर्दैवी मृत्यू झाला. पोलिसांच्या माहितीनुसार, दीपेश आणि रितेश शिरगावकर हे दोघे कारने अस्नोड्याकडे जात असताना रस्त्यानजीक असलेल्या कालव्यात कार अचानक कोसळली.

स्थानिकांनी घटना पाहताच त्वरित मदतीस धाव घेतली. कालव्यातील पाण्याचा वेग जास्त असल्यामुळे दीपेशला त्वरित वाचवता आले नाही, मात्र चालक रितेश शिरगावकर याला स्थानिकांनी बाहेर काढले आणि त्वरित रुग्णवाहिकेतून म्‍हापसा येथील इस्पितळात उपचारासाठी पाठवले.

कोलवाळ पोलिसांनी घटनास्थळी धाव घेत, मृत्यूमुखी पडलेल्या दीपेश याचा मृतदेह आणि अपघातग्रस्त कार क्रेनच्या मदतीने कालव्यातून बाहेर काढण्यात आली. पोलिसांनी दिलेल्या माहितीनुसार, अपघाताचे नेमके कारण अहवालावरून स्पष्ट होईल.

स्थानिकांनी दिलेल्या माहितीनुसार, कालव्याच्या पाण्याचा वेग वाढला होता. वाहन चालकांनी सावधगिरी बाळगावी, अन्यथा अशी दुर्घटना होऊ शकते. या प्रकारामुळे स्थानिक चिंता व्यक्त करत आहेत.